کراچی (این این آئی) یونائیٹڈ بزنس گروپ کے سرپرست اعلیٰ ایس ایم منیر،چیئرمین افتخار علی ملک،صدر زبیر طفیل،سیکریٹری جنرل ظفر بختاوری،چیئرمین سندھ خالد تواب، ممبران ایف پی سی سی آئی کی ایگزیکٹو کمیٹی سمیت دیگر رہنماؤں نے گزشتہ مالی سال کے مقابلے رواں سال اٹلی کو کی جانے والے برآمدی حجم میں 786 ملین ڈالر کے اضافے کو اہم سنگ میل قرار دیا ہے۔

انہوں نے کہا کہ اٹلی کو برآمدات میں 49 فیصد اضافہ وزارت تجارت اور اٹلی میں پاکستانی سفارت خانے کی مشترکہ کوششوں کے باعث ہوا ہے۔ انہوں نے کہا کہ کورونا کے باعث اٹلی وبائی مرض کی تباہی کے باعث شدید معاشی بحران کا شکار رہا، اور اس کا جی ڈی پی تاریخ کی کم ترین سطح پر پہنچ گیا۔ انہوں نے کہا کہ اٹلی کی مارکیٹ میں ٹیکسٹائل، لیدراور چاول، اٹلی ہماری برآمد میں اہم شراکت دار ہیں، اوربرآمدی اشیاء میں اضافہ کی گنجائش موجود ہے۔ انہوں نے مزید کہا کہ اٹلی یورپ میں پاکستان کا اہم تجارتی شراکت دار بھی ہے اور عالمی منڈی میں پاکستان کی پانچویں بڑی برآمدی مارکیٹ ہے۔انہوںنے زور دیا کہ دونوں ممالک کی معیشتیں اقتصادی اور تجارتی تعاون کو مزید بڑھانے کی زبردست صلاحیت رکھتی ہیں خاص طور پر تعمیرات، زراعت، ٹیکنالوجی، پلاسٹک، پروسیس فوڈ، ڈیری، لائیو اسٹاک، دواسازی اور ماحولیاتی تحفظ کے شعبوں میں مزید مواقع تلاش کئے جائیں۔ یو بی جی رہنماؤں نے تجارتی اداروں سے اپیل کی کہ وہ اپنے ممبروں پر زور دیں کہ وہ یورپی اداروں اور بیرون ملک پاکستانی سفارتخانوں کے تجارتی شعبوں کے ساتھ اشتراک سے تجارت کی نئی راہیں تلاش کرنے کیلئے ہر ممکن اقدامات کریں۔