لاہور(مانیٹرنگ ڈیسک، این این آئی)لاہورجوہر ٹائون بم دھماکہ کیس میں انتہائی اہم پیش رفت سامنے آئی ہے۔نجی ٹی وی کے مطابق حساس ادارے نے دھماکے میں استعمال ہونے والی گاڑی کے مالک کو حراست میں لے لیا ۔گاڑی کے مالک کو فلائٹ سے آف لوڈ کر کے حراست میں
لیا گیا۔گاڑی کا مالک جہاز کے ذریعے کراچی جانے کی کوشش کر رہا تھا۔ ملزم کو نامعلوم مقام پر تفتیش کے لیے منتقل کر دیا گیا ہے۔گاڑی کے مالک کا تعلق حافظ آباد سے بتایا جاتا ہے،دوسری جانب پاکستان مسلم لیگ (ن)کے صدر شہبازشریف نے لاہور میں دھماکے میں قیمتی جانوں کے ضیاع پر اظہارافسوس کرتے ہوئے کہاکہ پنجاب کے دارلحکومت میں یہ واقعہ آنکھیں کھولنے کے لئے کافی ہے ،کب سے کہہ رہا ہوں کہ امن وامان کی بگڑتی صورتحال توجہ کا تقاضا کررہی ہے ،اہم قومی مسائل کو پس پشت ڈالنے سے کام نہیں چلے گا ۔انہوںنے کہاکہ سرد مہری اور معاملات ٹالنے کی قیمت ملک اور قوم کو ادا کرنا پڑ رہی ہے ۔لہو کی فصل پہلے ہی کاٹ چکے ہیں، اس عفریت کا دوبارہ زندہ ہونا نیک شگون نہیں ۔شہبازشریف نے شہداکے درجات کی بلندی اور اہل خانہ کے لئے صبر جمیل کی دعاکی ۔علاوہ ازیں پنجاب اسمبلی میں قائد حزب اختلاف حمزہ شہباز نے لاہوربم دھماکہ کی مذمت کرتے ہوئے کہاکہ دھماکے میں قیمتی جانوں کے ضیاع پر بہت دکھ ہے۔لاہور میں یہ واقعہ حکمرانوں کی آنکھیں کھولنے کے لئے کافی ہے۔ انہوںنے کہاکہ امن و امان کی صورتحال انتہائی گھمبیر ہے جس کا اندازہ حکمرانوں کو نہیں،ہم پہلے ہی دہشت گردی کے عفریت سے بڑی مشکل سے نکلے ہیں اس کا دوبارہ زندہ ہونا نیک شگون نہیں۔
