اسلام آباد(مانیٹرنگ ڈیسک، این این آئی)صوبائی دارالحکومت لاہور کے علاقے جوہر ٹائون میں آج ساڑھے گیارہ بجے کے قریب ایک زور دار دھماکہ ہوا، ذرائع کے مطابق جس جگہ پر دھماکہ ہوا وہ کالعدم جماعت الدعوةکے سربراہ حافظ سعید کی رہائش گاہ کے قریب ہے تاہم حکام کی جانب سے تاحال اس حوالے سے کوئی بیان سامنے نہیں آیا۔ایک شہری نے تصدیقکی ہے کہ دھماکہ حافظ سعید کی رہائش گاہ کے قریب ہوا ہے،انہیں گھر میں نظر بند کیا گیا ہے،حافظ سعید کے گھر کے باہر سکیورٹی موجود ہوتی ہے اور اسی کے سامنے آج دھماکہ ہوا ہے۔حافظ سعید کی
سیکورٹی کے لیے ایک گاڑی ہر وقت موجود رہتی ہے جبکہ پولیس بھی ہر وقت ان کی رہائش گاہ کے قریب ہوتی ہے۔ایک اورشہری کے مطابق گھروں میں لوہے کے ٹکڑے بھی گرے ہیں،علاقے سے منتخب ہونے والے ممبر صوبائی اسمبلی نذیر چوہان کا کہنا ہے کہ جس وقت دھماکہ ہوا میں اسی وقت پہنچ گیا تھا،پولیس کے مطابق ہمارے دو لوگ بھی شہید ہو گئے ہیں،دھماکے کی نوعیت کے حوالے سے تو ادارے ہی بتائیں گے تاہم مجھے یہ گیس سلنڈر دھماکہ نہیں لگ رہا کیونکہ دھماکے سے پانچ سے چھ گھر تباہ ہوئے ہیں۔جب رکن صوبائی اسمبلی سے علاقے میں حافظ سعید کی رہائش گاہ سے متعلق سوال کیا گیا تو انہوں نے کہا میرا نہیں خیال وہ ادھر رہتے ہیں۔ان کا گھر کسی دوسرے علاقے میں ہے ،دوسری جانب وفاقی وزیر داخلہ شیخ رشید احمد نے جوہر ٹاؤن لاہور دھماکے کا نوٹس لیتے ہوئے چیف سیکرٹری اور آئی جی پنجاب سے رپورٹ طلب کرلی ۔ اپنے بیان میں وزیر داخلہ نے چیف سیکرٹری اور آئی جی پنجاب سے دھماکے کی رپورٹ طلب کرلی۔وزیر داخلہ شیخ رشید احمد نے دھماکے سے زخمی ہونے والوں کی جلد صحتیابی کے لئے دعا کی ۔ وزیر داخلہ نے کہاکہ دھماکے کی نوعیت کا پتہ لگایا جارہا ہے،وفاقی ادارے تحقیقات میں پنجاب حکومت کی معاونت کررہے ہیں۔
