اسلام آباد(مانیٹرنگ ڈیسک /آن لائن)نوجوان فاسٹ بولر نسیم شاہ کا کہنا ہے کہ انسان سے غلطیاں ہو جاتی ہیں اور یہ زندگی کا حصہ ہے، میرا ابوظہبی میں رزق لکھا تھا اور میں اب یہاں پہنچ گیا یہی میرا یقین ہے۔کوئٹہ گلیڈی ایٹرز کے نسیم شاہ نے کورونا ایس او پیز کی خلاف ورزی
کی تھی جس پر انہیں پی ایس ایل سے باہر کردیا گیا تھا تاہم وہ پھر سے کورونا ٹیسٹ منفی آنے کے بعد ابو ظہبی روانہ ہوئے ۔ان کا کہنا ہے کہ پی ایس ایل کا الگ ہی مزہ ہے اور وہ اس کے لیے بہت پرجوش ہیں لہٰذا وہ 100 فیصد پرفارم کریں گے، کرکٹ زندگی ہے، کہیں بھی کھیلی جائے، خوشی ہوتی ہے، میرا ہدف یہی ہوتا ہے کہ محنت اور دلیری کے ساتھ کھیلنا ہے۔نسیم شاہ کا کہنا تھا کہ قرنطینہ میں وقت گزارنے کی اب عادت ہو چکی ہے اور کئی بار قرنطینہ مکمل کر چکے ہیں، اس دوران فکر فٹنس کی ہوتی ہے، فٹنس برقرار رکھنے کے لیے کمرے میں دستیاب سہولیات سے بھرپور فائدہ اٹھاتا ہوں۔دوسری جانب محمد عباس اور نسیم شاہ کے درمیان ہونے والی دلچسپ گفتگو سوشل میڈیا پر وائرل ہوگئی۔ نسیم شاہ 82 ویں اوور کے اختتام پر سٹرائیکر اینڈ پر موجود محمد عباس سے کہتے ہیں کہ’’عباس بھائی! آپ کو پتہ ہے کہ ساری ذمہ داری مجھ پر ہے، سنگل کرنا ہے ورنہ ڈانٹ پڑجائے گی‘۔ نسیم شاہ کی بات پر محمد عباس کی ہنسنے کی آواز بھی سنائی دیتی ہے۔یاد رہے کہ اس میچ میں محمد عباس کو ہدایات دینے والے نسیم شاہ 12 رنز پر بولٹ کے ہاتھوں آؤٹ ہوگئے اور اس طرح پوری پاکستانی ٹیم 297 رنز پر ڈھیر ہوگئی۔
