اسلام آباد (نیوز ڈیسک)نیشنل سائبر کرائم انویسٹی گیشن ایجنسی (این سی سی آئی اے) نے اداکارہ مومنہ اقبال اور پنجاب اسمبلی کے رکن ثاقب چکو کو ایک بار پھر نوٹس جاری کرتے ہوئے انہیں تحقیقات میں پیش ہونے کی ہدایت کردی۔
این سی سی آئی اے کے ترجمان کے مطابق دونوں شخصیات کو سامنے آنے والے نئے ڈیجیٹل شواہد کی روشنی میں دوبارہ طلب کیا گیا ہے۔ معاملے کی مزید چھان بین کے لیے خصوصی تحقیقاتی ٹیم بھی تشکیل دے دی گئی ہے۔
ترجمان نے بتایا کہ تحقیقاتی ٹیم کی قیادت ڈپٹی ڈائریکٹر سطح کا افسر کرے گا۔ ٹیم نئے ڈیجیٹل شواہد کے ساتھ ساتھ پہلے سے موجود ریکارڈ اور دیگر متعلقہ معلومات کا بھی تفصیلی جائزہ لے گی۔
این سی سی آئی اے کے مطابق خصوصی تحقیقاتی ٹیم کو ایک ماہ کے اندر تحقیقات مکمل کرکے اپنی رپورٹ ڈائریکٹر جنرل کو پیش کرنا ہوگی۔
ترجمان کا کہنا ہے کہ تحقیقاتی رپورٹ موصول ہونے کے بعد اس کی سفارشات اور نتائج کی بنیاد پر آئندہ قانونی کارروائی سے متعلق فیصلہ کیا جائے گا۔
