اسلام آباد(نیوز ڈیسک)پاکستانی فلم انڈسٹری کی معروف اداکارہ میرا نے اپنی قریبی دوست اور اداکارہ لیلیٰ کے ماضی کے مشکلات بھرے حالات پر بات کرتے ہوئے اداکارہ ریشم کے حوالے سے اہم الزامات عائد کیے ہیں۔
لیلیٰ ان دنوں ایک پاکستانی ریئلٹی شو کا حصہ ہیں، جہاں ان کی شخصیت اور دیگر شرکا کے ساتھ ان کا اندازِ گفتگو ناظرین کی توجہ حاصل کر رہا ہے۔
اسی دوران میرا نے سوشل میڈیا پر لیلیٰ کے لیے ایک تفصیلی پیغام جاری کیا اور مداحوں سے ان کی حوصلہ افزائی کے ساتھ ساتھ انہیں ووٹ دینے کی اپیل کی۔میرا نے دعویٰ کیا کہ لیلیٰ نے اپنی زندگی میں انتہائی مشکل مالی حالات کا سامنا کیا۔ ان کے مطابق لیلیٰ نے کم عمری ہی سے اپنے خاندان کی ذمہ داریاں اٹھائیں اور کئی مشکلات کا مقابلہ کرتے ہوئے اپنے اہلخانہ کی کفالت کی۔اداکارہ نے مزید دعویٰ کیا کہ لیلیٰ کو ایک وقت میں مالی بحران کا سامنا کرنا پڑا اور اس دوران انہیں اپنی گاڑی، گھر اور زیورات سمیت متعدد چیزوں سے محروم ہونا پڑا۔
میرا نے الزام عائد کیا کہ لاہور میں تقریباً دو دہائیوں کے دوران ریشم کی جانب سے لیلیٰ کے مشکل حالات کا مذاق اڑایا جاتا رہا اور انہیں اس وقت نیچا دکھانے کی کوشش کی جاتی تھی جب ان کے پاس ذاتی گھر یا گاڑی بھی موجود نہیں تھی۔اداکارہ نے لیلیٰ کو اپنی بہن قرار دیتے ہوئے کہا کہ وہ چاہتی ہیں کہ ان کی دوست اب زندگی میں سکون اور خوشیاں حاصل کریں اور مستقبل میں شادی کے بعد ایک خوشحال زندگی گزاریں۔
میرا نے ریئلٹی شو میں لیلیٰ کی کارکردگی کو بھی سراہا اور انہیں شو کی ’کوئین‘ قرار دیتے ہوئے کہا کہ وہ کامیابی کی سب سے زیادہ مستحق امیدوار ہیں۔آخر میں میرا نے اپنے مداحوں سے اپیل کی کہ وہ لیلیٰ کی حمایت کریں اور انہیں زیادہ سے زیادہ ووٹ دے کر کامیابی دلانے میں اپنا کردار ادا کریں۔
