کراچی(این این آئی)پاکستان کے ممتاز پاپ گلوکار عالمگیر نے کہا بچپن سے ہی گٹار بجانے اور گنگنانے کا شوق تھا اور یہ بات حقیقت ہے کہ موسیقی روح کی غذا ہے۔ ان خیالات کا اظہار انہوں نے ایک انٹرویو میں کیا۔ عالمگیر نے کہا طبیعت کی ناسازی کے باعث ماضی میں تسلسل کیساتھ پرفارمنس نہیں دے سکا لیکن اب بہتر ہوں اور تین چار گھنٹے مسلسل کھڑے ہوکر پرفارم کرسکتا ہوں۔انہوں نے انکشا ف کیا کہ میں کبھی گائیکی کو اپنا پیشہ نہیں بنانا چاہتا تھا لیکن پھر زندگی میں ایسا موڑ آیا کہ اسے اپنا پیشہ بنانا پڑا، اب تو مجھ پر فلم بھی تیار کی جارہی ہے جو جلد منظر عام پر آئیگی۔عالمگیر نے کہا مجھے اس مقام تک پہنچانے میں میرے مداحوں کا بڑا عمل دخل ہے ،ماضی کے لیجنڈ گلوکاروں کی آواز کو پسند کرتا ہوں جبکہ نوجوان سنگرز جو آجکل اپنی آواز کا جادو جگا رہے ہیں ان میں عاطف اسلم اور راحت فتح علی خان ہیں، میرا ماننا ہے کہ پاکستان میں باصلاحیت فنکاروں کی کمی نہیں۔

موضوعات:گلوکار عالمگیر