ممبئی (این این آئی)گزشتہ برس کے اختتام پر کرکٹر ویرات کوہلی سے شادی کرکے میڈیا کی شہ سرخیوں میں جگہ بنانے والی بولی وڈ اداکارہ انوشکا شرما کی مسلسل دوسری فلم بھی ناکام ہوگئی۔شادی سے پہلے ان کی آخری فلم ’جب ہیری میٹ سیجل‘ تھی، جس میں وہ شاہ رخ خان کے ساتھ رومانس کرتی نظر آئیں تھیں، جو باکس آفس پر بری طرح ناکام ہوگئی تھی۔

شادی کے بعد ان کی پہلی فلم ’پری‘ تھی ۔جسے رواں ماہ 2 مارچ کو ریلیز کیا گیا تھا، تاہم فلم نے ریلیز کے ابتدائی 5 دن میں بھارت بھر سے صرف 2 کروڑ 14 لاکھ روپے بٹورے ہیں۔یوں انوشکا شرما کی مسلسل 2 فلمیں ناکام ہوگئیں، جب کہ ان کی گزشتہ برس ریلیز ہونے والی فلم ’فلوری‘ بھی ہٹ ہونے میں ناکام ہوگئی تھی۔خیال کیا جا رہا تھا کہ انوشکا شرما کی فلم ’پری‘ اچھی کمائی کرنے میں کامیاب ہوگی، تاہم فلم نے امیدوں کے برعکس انتہائی کم کمائی کی۔کوئی موئی کی رپورٹ کے مطابق انوشکا شرما کی فلم ’پری‘ نے بھارت سے 5 دن میں 2 کروڑ 14 لاکھ روپے جب کہ دنیا کے دیگر ممالک سے 15 کروڑ روپے بٹورے۔یوں ابتدائی 5 دن میں ’پری‘ دنیا بھر سے 17 کروڑ 48 لاکھ روپے کمانے میں کامیاب گئی۔خیال رہے کہ انوشکا شرما کی اس فلم کو پاکستان میں نمائش کی اجازت نہیں دی گئی تھی۔’پری‘ کی پاکستان میں نمائش نہ ہونے سے متعلق فلم سنسر بورڈ کے چیئرمین مبشر حسن نے ڈان کو بتایا تھا کہ ’پری‘ کا موضوع فلموں کے لیے طے ضابطہ اخلاق کی متعدد شقوں کی خلاف ورزی کرتا ہے اور فلم میں متعدد مناظر کالے جادو کے ہیں جن کے دوران قرآنی آیات اور ہندو منتر اکھٹے پڑھے گئے۔خیال رہے کہ فلم کی ہدایات پروست جوشی نے دی ہیں، فلم کی دیگر کاسٹ میں ریتابھاری چکربورتی، پرمبرتا چترجی اور رجت کپور سمیت دیگر اداکار شامل ہیں۔