اسلام آباد (مانیٹرنگ ڈیسک)پاکستانی ڈرامہ کوئین اور ماضی کی معروف اداکارہ عارفہ صدیقی کے شوہر اور معروف موسیقار استاد نذرحسین 85برس کی عمر میں وفات پا گئے۔ تفصیلات کے مطابق ’کچھ دن تو بسو میری آنکھوں میں، غنچہ شوق، رات پھیلی ہے تیرے، کبھی کہا نہ کسی سے، دل ہی دل میں، دل دھڑکنے کا سبب یاد آیا‘‘ جیسی شہرہ آفاق غزلوں کے خالق موسیقار اور
ماضی کی معروف اداکارہ عارفہ صدیقی کے شوہر، استاد نذر حسین85 برس کی عمرمیں وفات پاگئے۔ استاد نذر حسین ایک ماہ قے پھیپھڑوں کے سرطان میں مبتلا تھے اور مقامی ہسپتال میں زیر علاج تھے۔ استاد نذر حسین کو لاہور کے مقامی قبرستان میں سپرد خاک کر دیا گیا ہے ۔ ان کی نماز جنازہ میں فنون لطیفہ سے تعلق رکھنے والے افراد کی بڑی تعداد کے علاوہ عزیز و اقارب نے بھی شرکت کی۔ استاد نذر حسین نے اپنی فنی سفر کا آغاز حیدر آباد ریڈیو سے کیا تھا۔ نامور شعراء کرام کے کلام کو انہوں نے بڑی مہارت کے ساتھ سچے سروں میں سجایا اورپھرشہنشاہ غزل مہدی حسن، ملکہ ترنم نورجہاں، غلام علی، فریدہ خانم، بلقیس خانم اورکئی بھارتی غزل گائیکوںنے ان کی کمپوزیشن میں بنی غزلوں کوریکارڈ کیا۔ خاص طورپرملکہ ترنم نورجہاں نے استاد نذرحسین کے ساتھ بہت کام کیا اوران کے فنی سفرمیں بہت سی مقبول غزلیں انہی کی کمپوزیشن میں ریکارڈ ہوئیں۔ اس کے علاوہ استاد نذرحسین نے ریڈیو پاکستان اورپاکستان ٹیلی ویژن کے ساتھ بھی بہت سے پروگرام ریکارڈ کروائے۔واضح رہے کہ ان کی اہلیہ عارفہ صدیقی بھی پاکستان ٹیلی ویژن کے ڈراموں میں سکرین پر آئیں اور کچھ ہی عرصہ میں اپنے فن اداکاری سے ملک اور بیرون ملک اردو ڈراموں کے مداحوں کو اپنی اداکاری سے گرویدہ کر لیا۔ گزشتہ چند ماہ پہلے عارفہ صدیقی کے حوالے سے خبر بھی آئی تھی کہ وہ لاہور میں گمنامی کی زندگی بسر کر رہی ہیں جبکہ شوبز کو خبرآباد کہہ کر انہوں نے گھریلو زندگی گزارنے کا فیصلہ کیا ہے۔
