اسلام آباد (مانیٹرنگ ڈیسک) معروف پاکستانی اداکارہ ماہرہ خان کی بھارتی اداکار رنبیر کپور کے ساتھ تصاویر منظر عام پر آ گئیں۔ تفصیلات کے مطابق پاکستانی اداکارہ ماہرہ خان کی امریکی شہر نیویارک میں بھارت کے اداکار رنبیر کپور کے ساتھ تصاویر سامنے آئی ہیں
جن میں وہ رنبیر کپور کے ساتھ سڑک کے کنارے کھڑی سگریٹ پی رہی ہیں۔ ایک نجی ٹی وی چینل نے ’’پنک ولا‘‘ نام کی ویب سائٹ پر شائع ہونے والی خبر کے حوالے سے بتایا کہ رنبیر کپور اس وقت نیو یارک میں سنجے دت کی زندگی پر بننے والی فلم کی شوٹنگ میں مصروف ہیں اور اس موقع پر ان کے ساتھ پاکستانی اداکارہ ماہرہ خان کو بھی وہاں دیکھاگیا ہے، ان دونوں اداکاروں کی تصاویر بھی منظر عام پر آ گئی ہیں، ذرائع کے مطابق یہ تصاویر نیو یارک میں ماہرہ خان کے ہوٹل کے باہر لی گئی ہیں اور ان تصاویر میں ماہرہ خان اور رنبیر کپور تمباکو نوشی کرتے ہوئے نظر آ رہے ہیں۔ پاکستانی اداکارہ ماہرہ خان نے سفید رنگ کا لباس پہن رکھا تھا جبکہ رنبیر کپور بھارتی اداکار سنجے دت کا روپ دھارے ہوئے ہیں۔ اس سے قبل پاکستانی اداکارہ ماہرہ خان اور رنبیر کپور کے درمیان تعلقات بارے افواہیں گردش کرتی رہیں تھیں مگر دونوں نے ان کی تردید کی تھی مگر اب ان تصاویر نے سوشل میڈیا پر آ کر سارا بھانڈہ پھوڑ دیا ہے۔
