اسلام آباد(مانیٹرنگ ڈیسک) ملکہ ترنم نور جہاں کا یوم پیدائش ، گوگل بھی نور جہاں کے گیت گانے لگا۔ تفصیلات کے مطابق ملکہ ترنم نور جہاں کے یوم پیدائش کے موقع پر دنیا کے سب سے بڑے سرچ انجن گوگل نے ملکہ ترنم نور جہاں کواپنا ڈوڈل بناتے ہوئے خراج تحسین پیش کیا۔

ملکہ ترنم نور جہاں 21ستمبر 1926کو قصور میں پیدا ہوئی تھیں۔ ان کا اصل نام اللہ وسائی تھا۔ ملکہ ترنم نور جہاں پاکستانی دنیائے شوبز کی ان شخصیات میں شمار ہوتی ہیں جنہوں نے متحدہ ہندوستان کی فلم انڈسٹری میں بھی کام کیا۔ انہوں نے نصف صدی سے زیادہ اپنی آواز کا جادو جگایا۔1935ءمیں بطور چائلڈ سٹار اپنے کریئر کا آغاز کیا اور اپنی وفات سے چند سال قبل تک فن کی دنیا سے وابستہ رہیںآپ نے کئی فلموں میں بطور اداکارہ بھی کام کیا۔ انہیں شاندار پرفارمنس کے باعث صدارتی ایوارڈ تمغہ امتیاز اور بعد ازاں پرائیڈ آف پرفارمنس سے بھی نوازا گیا۔ 1965ءکی جنگ میں ا نہوں نے میرے ڈھول سپاہیا ، اے وطن کے سجیلے جوانوں ، ایہہ پتر ہٹاں تے نیئی وکدے ، او ماہی چھیل چھبیلا، یہ ہوائوں کے مسافر ، رنگ لائے گا شہیدوں کا لہو، میرا سوہنا شہر قصورنیں سمیت بے شمار ملی نغمے گا کر قوم اور فوج کے جوش و ولولہ میں اضافہ کیا۔ آپ نے 74برس کی عمر میں 23دسمبر کی سرد شام اس دنیائے فانی کو خیر آباد کہا۔