ممبئی (این این آئی)بھارتی فلم انڈسٹری کے معروف اداکار چنکی پانڈے کی صاحبزادی انانیا پانڈے بھی بالی ووڈ میں انٹری دینے کو تیار ہیں۔ اگرچہ معروف اداکارہ سری دیوی کی صاحبزادی جھانوی کپور اور سیف علی خان کی بیٹی سارہ علی خان بھارتی فلم انڈسٹری میں داخل ہونے کیلئے ابھی تک انتظار کر رہی ہیں
دوسری جانب ایک نام ایسا بھی ہے جو شاید ان سے پہلے بالی ووڈ میں انٹری دیدے۔انڈین میڈیا کے مطابق اداکار چنکی پانڈے کی صاحبزادی انانیا پانڈے بھی بالی ووڈ میں انٹری دینے کو تیار ہیں۔ خبریں ہیں کہ سپر سٹار سلمان خان نے انانیا کو فلموں میں بریک دینے کی حای بھر لی ہے۔ انانیا پانڈے کی ابھی عمر صرف 18 سال ہے اور انہوں نے حال ہی میں اپنی گریجویشن مکمل کی ہے۔ اطلاعات ہیں کہ انانیا اپنے دوستوں کے ہمراہ تفریح کیلئے ان دنوں گوا میں موجود ہیں۔ واپسی کے فوری بعد وہ مشہور فٹنس ٹرینر یاسمین کراچی والا کی زیر نگرانی ٹریننگ شروع کر دیں گی۔انڈین میڈیا کے مطابق انانیا کے کزن آہان پانڈے بھی بالی ووڈ میں انٹری کیلئے پر تول رہے ہیں۔ دونوں نے اپنے فلم پلانز کو ایک دوسرے کے ساتھ شیئر کیا ہے۔ انانیا پانڈے نے حال ہی میں ڈانس کلاسز میں بھی داخلہ لیا تھا۔ چنکی پانڈے نے میڈیا سے گفتگو میں تصدیق کرتے ہوئے بتایا کہ جی ہاں! انانیا بالی ووڈ اداکارہ بننا چاہتی ہیں۔ اس بارے میں کچھ عرصہ قبل میری انانیا سے بات ہوئی تھی۔
