کراچی (این این آئی)پاکستان کے معروف قوال و گلوکار راحت فتح علی خان ایک بار پھر ایک بولی وڈ فلم کے لیے گانا گائیں گے۔راحت فتح علی خان کو گزشتہ سال روینہ ٹنڈن کی نئی فلم ’’ماتر دی مدر ‘‘میں گانے کی پیشکش کی گئی تھی۔ راحت فتح علی خان نے اس خبر کی تصدیق کرتے ہوئے بتایا کہ یہ گانا فیوژن بینڈ کے عمو کے ذریعے ریکارڈ کیا گیا۔ان کا مزید کہنا تھا کہ یہ ایک پراثر گانا ہے تاہم انہوں نے مزید تفصیلات بتانے
سے گریز کیا۔فیوژن بینڈ کے عمو کے دوست اور اس فلم کے ڈائریکٹر اشتر سید کافی عرصے سے اکھٹے کام کرنے کی منصوبہ بندی کررہے تھے اور اس فلم کے ساتھ دونوں نے اشتراک کیا۔انہوں نے اپنے ایک اور قریبی دوست مائیکل پیلیسو سے بطور پروڈیوسر کام کرنے کی درخواست کی ۔فیوڑن بینڈ کی خوش قسمتی تھی کہ انہوں نے اس فلم کے گانے پاکستان اور بھارت کے درمیان گزشتہ سال ہونے والی کشیدگی سے پہلے ریکارڈ کرلیے تھے۔عمو کے مطابق گزشتہ سال مارچ اپریل میں تمام گانوں کی ریکارڈنگ کرلی گئی تھی اور اس بات کو یقینی بنایا گیا تھا کہ راحت فتح علی خان ایک گانا گائیں۔یہ فلم 21 اپریل کو ریلیز کی جارہی ہے۔
