لاہور( آن لائن ) ون مین شو کے نامور کامیڈین غفار لہری نے بے روزگاری اور کسمپرسی سے تنگ آکر پنجاب اسمبلی کے سامنے خودکشی کرنے کی دھمکی دے دی۔ ان کا کہنا تھا کہ حکومت پنجاب کی طرف سے شادی ہالز کا وقت دس بجے رات کرنے کی وجہ سے صوبہ بھرمیں میوزیکل شوز بند ہوگئے ہیں جس کے باعث میرے سمیت کئی گلوکار اور ہزاروں کی تعداد میں سازندے بے روزگار ہوچکے ہیں۔ ہم نے حکومت سے کئی بار درخواست کی ہے کہ شادی اور دیگر ہالز بند کرنے کا وقت رات بارہ بجے تک کر دیا جائے لیکن ہماری شنوائی نہیں ہوئی۔ میں گزشتہ کئی برسوں سے محنت مزدوری کرکے گزارا کر رہا ہوں لیکن اب کچھ عرصہ سے بے روزگار ہوں اور مجھے مالک مکان نے گھر خالی کرنے کی دھمکی دے دی ہے اور میں بہت مقروض ہوچکا ہوں۔ اس کے علاوہ میں نے 2015 میں آرٹسٹ سپورٹ فنڈ کے لئے درخواست جمع کرائی تھی لیکن آج تک اس پر بھی عملدرآمد نہیں ہوا۔ حکومت سے اپیل ہے کہ وہ میری مالی معاونت کرے اور مجھے مشکلات سے نکلنے میں مدد کرے۔ اگر میری درخواست پر فوری کارروائی نہ کی گئی تو میں پنجاب اسمبلی کے سامنے زندگی کا خاتمہ کرلوں گا۔

موضوعات:پنجاب اسمبلی کامیڈین خودکشی