اسلام آباد (این این آئی)سوشل میڈیا پر معروف شخصیات کے فیک اکائونٹس بنانے والوں کی شامت آگئی ،حکومت نے پرسنل ڈیٹا پروٹیکشن 2020 تیار کرلیا ۔ دستاویز کے مطابق کسی بھی شخصیت کی تصاویراور معلومات چرا کر استعمال کرنے والوں کو سزا بھگتنا ہوگی، معروف شخصیات کے فیک اکائونٹ اورآئی ڈیز بنانے کی حوصلہ شکنی ہوگی ، بنک اکائونٹ کریڈٹ کارڈ، بائیومیٹرک ڈیٹا، زہنی صحت میڈیکل ریکارڈ عقائدسے متعلق معلومات محفوظ ہوں گی،کسی شخصیت کی ذاتی معلومات کو کمرشل مقاصد کے لیے استعمال نہیں کیاجاسکے گا۔

دستاویز کے مطابق ڈیٹا پروٹیکشن کے حوالے سے سات افراد پر مشتمل پرسنل ڈیٹا پروٹیکشن اتھارٹی آف پاکستان بنائی جائیگی،اتھارٹی میں وزارت آئی ٹی دفاع اور داخلہ اور آئی ٹی ماہرین شامل ہوں گے ،اتھارٹی ڈیٹا کنٹرولر اورڈیٹا پروسیسر کے لائسنسگ فریم ورک بنائے گی ،اتھارٹی کے امور چلانے کے لیے پرسنل ڈیٹا پروٹیکشن فنڈ قائم کیاجائے گا ،ڈیٹا کی سیکورٹی میں غفلت برتنے والے کو پچاس لاکھ جرمانے کی سزا ہوگی،پرسنل پروٹیکشن ایکٹ کی خلاف ورزی پرڈٰیڑھ کروڑ روپے کا جرمانہ ہوگا ،ایک سے زائد بار ذاتی معلومات چوری کرنے پر اڑھائی کروڑ روپے جرمانے کی سزا ہوگی۔

موضوعات:سوشل میڈیا