اسلام آباد (نیوز ڈیسک) بلوچستان میں پولیس سربراہ کی تبدیلی کے معاملے پر ایک اہم پیش رفت سامنے آئی ہے، جہاں وفاقی حکومت کی جانب سے گریڈ 21 کے سینئر افسر وسیم سیال کو آئی جی بلوچستان بننے کی پیشکش کی گئی، تاہم انہوں نے اس عہدے کو سنبھالنے سے معذرت کر لی ہے۔ذرائع کے مطابق، موجودہ انسپکٹر جنرل آف پولیس (آئی جی) بلوچستان، معظم جاہ انصاری، جو کہ گریڈ 22 کے افسر ہیں، 4 اگست کو ریٹائر ہو رہے ہیں۔ اس کے بعد صوبے میں نئے آئی جی کی تعیناتی کا عمل جاری ہے۔وسیم سیال، جو اس وقت پنجاب میں سی ٹی ڈی کے ایڈیشنل آئی جی کے طور پر کام کر رہے ہیں، کو دہشت گردی کے خلاف آپریشنز کا وسیع تجربہ حاصل ہے، اسی لیے اعلیٰ سطح پر انہیں بلوچستان کے لیے موزوں امیدوار تصور کیا گیا۔

تاہم، ذرائع نے بتایا کہ انہوں نے بلوچستان میں خدمات انجام دینے سے انکار کرتے ہوئے صوبہ پنجاب میں ہی تعیناتی کو ترجیح دی۔اطلاعات کے مطابق، وسیم سیال نے لاہور میں کیپیٹل سٹی پولیس آفیسر (سی سی پی او) کے طور پر تعیناتی میں دلچسپی ظاہر کی، جو پنجاب پولیس میں آئی جی کے بعد سب سے نمایاں انتظامی منصب سمجھا جاتا ہے۔ ماضی میں یہ قیاس آرائیاں بھی سامنے آئی تھیں کہ اگر لاہور کے موجودہ سی سی پی او بلال صدیق کمیانہ کا تبادلہ ہوتا ہے تو وسیم سیال اس عہدے کے مضبوط امیدوار ہوں گے، تاہم کمیانہ تاحال اپنے منصب پر برقرار ہیں۔وفاقی اور صوبائی حکام اب متبادل امیدوار کی تلاش میں مصروف ہیں، تاکہ بلوچستان میں سکیورٹی چیلنجز سے مؤثر انداز میں نمٹا جا سکے۔