لاہور( این این آئی)چوہنگ کے قریب چار افراد نے اٹھارہ سالہ خاتون کو شوہر کے سامنے اجتماعی زیادتی کا نشانہ بنا ڈالا،پولیس نے مقدمہ درج کرلیا،واقعہ میں ملوث دو ملزمان مارے گئے ۔ بتایا گیا ہے کہ واقعہ تھانہ چوہنگ کی حدودمیں شاہ پورکانجراں کے علاقے میں پیش آیا،پولیس نے متاثرہ خاتون کے شوہر کی مدعیت میں مقدمہ درج کر لیا۔متاثرہ شہری کے مطابق وہ اہلیہ کے ہمراہ کھیتوں میں چہل قدمی کیلئے نکلا،تین افراد جن کی عمریں 18 سے 28 سال ہیں انہوں نے اہلیہ سے زیادتی کی،تینوں نے فون کر کے ایک اور شخص کو بھی بلا لیا،ملزمان نے اہلیہ پربدترین جنسی تشدد کیا اور وقوعہ کی ویڈیو بھی بنائی۔

دوسی جانب سی سی ڈی نے بروقت ایکشن لیتے ہوئے واقعہ میں ملوث 2 مرکزی ملزمان کو ہلاک کردیا۔سی سی ڈی کی جانب سے ملزمان کی گرفتاری کے لئے رات کو متعلقہ علاقوں میں چھاپے مارے گئے ،ملزمان نے سی سی ڈی ٹیم پرفائرنگ کی جس سے ایک اہلکار زخمی جبکہ پولیس کی جوابی فائرنگ اورملزمان کے ساتھیوں کی فائرنگ سے دو مرکزی ملزمان ہلاک ہوگئے۔ہلاک ملزمان کی شناخت اویس اور ارشاد کے نام سے ہوئی،ملزمان کے 4 مفرور ساتھیوں کی تلاش جاری ہے، علاقہ کی ناکہ بندی کردی گئی ہے۔