لاہور( این این آئی)صوبہ پنجاب کے دارالحکومت لاہور میں قتل کی 2 مختلف وارداتوں کا سراغ لگا لیا گیا، 72 سالہ بزرگ کو اغوا ء کے بعد قتل کرنے اور لاش جلانے والا مبینہ قاتل دیرینہ دوست نکلا، جبکہ 10 سالہ بیٹی کو قتل کرنے والے باپ کو بھی گرفتار کرلیا گیا۔بزرگ شہری اور کم سن بچی کے قتل کی واردات کی تفتیش مکمل کرکے ملزمان کو گرفتار کرلیا گیا۔ڈ ی آئی جی انویسٹی گیشن ذیشان رضا کے مطابق کاہنہ میں 72 سالہ بزرگ کے قتل کا معاملہ حل کرلیا گیا۔
انہوں نے بتایا کہ دوران تفتیش انکشاف ہوا کہ مقتول کے دیرینہ دوست نے دھوکے سے فرخ شکیل کو گھر بلایا، بیٹے کے ساتھ مل کربلڈ پریشر لو کرنے کی دوائیں کھلانے کے بعد گلا دباکر قتل کر دیا اور پھر لاش دوسرے شہر لے جا کر جلا دی۔دوسری جانب شمالی چھائونی میں 10 سالہ بیٹی کو قتل کرنے والے باپ آصف کو بھی گرفتار کرلیا گیا۔دوران تفتیش انکشاف ہوا کہ بیوی سے علیحدگی کے غصے میں ملزم نے بیٹی کو اینٹوں کے وار کرکے قتل کیا جبکہ دو بیٹے محفوظ رہے۔
