اسلام آباد (نیوز ڈیسک)کراچی کے علاقے گھگر پھاٹک کے نزدیک ایک افسوسناک واقعہ پیش آیا ہے جہاں ایک جوڑے اور ان کے کمسن بچے کو مبینہ طور پر غیرت کے نام پر موت کے گھاٹ اتار دیا گیا۔پولیس کے مطابق مقتولین کی لاشیں ان کے گھر سے برآمد ہوئیں، جن کی شناخت عبدالمجید، ان کی اہلیہ سکینہ اور چھ سالہ بیٹے عبدالنبی کے طور پر کی گئی ہے۔ جائے واردات سے تمام ضروری شواہد اکٹھے کر لیے گئے ہیں اور تفتیش کا آغاز کر دیا گیا ہے۔ایس ایس پی ملیر عبدالخالق پیرزادہ کا کہنا ہے کہ یہ خونی واقعہ پرانی رنجش اور محبت کی شادی کا نتیجہ ہے۔
اطلاعات کے مطابق مقتول جوڑے نے کئی سال قبل اپنی مرضی سے شادی کی تھی، جس پر لڑکی کے خاندان کو اعتراض تھا۔ صلح کی کوششیں تو جاری تھیں، لیکن گزشتہ شب لڑکی کے قریبی رشتہ داروں نے کلہاڑیوں سے حملہ کر کے تینوں کو قتل کر دیا۔تحقیقات میں یہ بھی سامنے آیا ہے کہ مقتولین نے تقریباً چھ ماہ قبل ہی گھگر پھاٹک کے قریب ایک گوٹھ میں رہائش اختیار کی تھی۔ دونوں خاندانوں کا تعلق اندرون سندھ کے علاقے شکارپور سے بتایا جا رہا ہے۔علاقہ مکینوں کا کہنا ہے کہ واقعے کے دوران کسی قسم کی چیخ و پکار یا ہنگامے کی آواز سنائی نہیں دی، جس سے اندازہ ہوتا ہے کہ واردات نہایت خاموشی سے انجام دی گئی۔پولیس حکام کا مزید کہنا ہے کہ مقدمہ مقتول شوہر کے خاندان کی مدعیت میں درج کیا جائے گا، جبکہ لاشوں کو ضابطے کی کارروائی مکمل کرنے کے بعد اسٹیل ٹاؤن کے سرد خانے منتقل کر دیا گیا ہے۔
