اسلام آباد (نیوز ڈیسک)تحصیل آبادپور کے کچے علاقے میں 20 سے زائد مسلح افراد نے اچانک دھاوا بول کر خوف و ہراس کی فضا قائم کر دی۔ ڈاکو نہ صرف 4 افراد کو زبردستی اغوا کر کے ساتھ لے گئے بلکہ 60 سے زیادہ بھینسیں بھی اپنے ساتھ لے کر فرار ہو گئے۔واقعے کی ایک ویڈیو سوشل میڈیا پر گردش کر رہی ہے جس نے علاقے میں شدید تشویش کی لہر دوڑا دی ہے۔ پولیس حکام کے مطابق اغوا ہونے والوں میں ظہیر، نیاز احمد، جبار اور الطاف کے نام شامل ہیں۔تھانہ آبادپور میں اس واقعے کے حوالے سے 20 سے زائد نامعلوم ملزمان کے خلاف مقدمہ درج کر لیا گیا ہے۔

پولیس نے بتایا کہ متاثرہ خاندانوں کی اطلاع پر فوری کارروائی عمل میں لاتے ہوئے علاقے میں سرچ آپریشن کا آغاز کر دیا گیا ہے۔نجی چینل “نیو نیوز” کے مطابق سیکیورٹی ادارے مغوی افراد کی جلد بازیابی اور چرائی گئی مویشیوں کی واپسی کے لیے تمام تر وسائل بروئے کار لا رہے ہیں۔ مقامی افراد کا کہنا ہے کہ کچے کے علاقوں میں جرائم پیشہ گروہوں کی سرگرمیاں روز بروز بڑھتی جا رہی ہیں، جس پر قابو پانے کے لیے مؤثر اور مستقل بنیادوں پر اقدامات کی اشد ضرورت ہے۔