اسلام آباد (نیوز ڈیسک) ممبئی: بالی وُڈ فلم ‘سو لانگ ویلی’ کے پروڈیوسر کرن سنگھ پر معروف ماڈل اور اداکارہ روچی گُجر نے مبینہ طور پر 23 لاکھ روپے کے فراڈ کا الزام عائد کیا ہے۔بھارتی ذرائع ابلاغ کے مطابق، جمعہ کی شب فلم کے پریمیئر کے دوران ایک غیر متوقع منظر اس وقت دیکھنے کو ملا جب روچی گُجر نے عوامی تقریب میں اسٹیج پر چڑھ کر کرن سنگھ کو چپل دے ماری۔ یہ ویڈیو چند ہی لمحوں میں سوشل میڈیا پر وائرل ہوگئی۔

پولیس حکام نے بتایا کہ اس واقعے سے ایک دن قبل اوشیوارا پولیس اسٹیشن میں مقدمہ درج کیا گیا تھا، جس میں مختلف دفعات کے تحت دھوکہ دہی اور مالی فریب کے الزامات شامل ہیں۔ماڈل کی طرف سے دائر کی گئی شکایت کے مطابق، پروڈیوسر کرن سنگھ نے ان سے وعدہ کیا تھا کہ اگر وہ ایک مخصوص فلمی منصوبے میں سرمایہ لگاتی ہیں، تو انہیں نہ صرف اس پروجیکٹ میں کردار ملے گا بلکہ منافع میں حصہ اور اسکرین پر کریڈٹ بھی دیا جائے گا۔ تاہم، شکایت کے مطابق یہ تمام وعدے بعد میں پورے نہیں کیے گئے۔پولیس نے واقعے کی تفصیلات کی چھان بین شروع کر دی ہے اور ضروری شواہد اکٹھے کیے جا رہے ہیں۔ حکام کا کہنا ہے کہ کیس کی نوعیت کو مدنظر رکھتے ہوئے مکمل قانونی کارروائی کی جائے گی۔