اسلام آباد (نیوز ڈیسکاسلام آباد کی ایک نجی ہاؤسنگ سوسائٹی میں سیلابی ریلے کی زد میں آ کر لاپتہ ہونے والے ریٹائرڈ کرنل اسحاق قاضی اور ان کی بیٹی کی لاشیں تلاش کر لی گئی ہیں۔تفصیلات کے مطابق وفاقی دارالحکومت میں حالیہ شدید بارشوں کے دوران کرنل (ر) اسحاق قاضی اپنی بیٹی کے ہمراہ گھر سے نکلے تھے کہ ان کی گاڑی اچانک خراب ہو گئی۔ اسی دوران تیز بہاؤ والا پانی کا ریلا آیا، جو ان کی گاڑی کو بہا کر لے گیا۔ نتیجتاً دونوں باپ بیٹی پانی میں ڈوب کر لاپتہ ہو گئے۔
ریسکیو ٹیموں کی جانب سے گزشتہ دو دنوں سے مسلسل سرچ آپریشن جاری تھا۔ ابتدائی طور پر سوسائٹی کے برساتی نالے میں تلاش کی گئی، تاہم وہاں سے کچھ سراغ نہ ملا۔ بعد ازاں، دریائے سواں کے داخلی اور خارجی پوائنٹس پر سرچ آپریشن شروع کیا گیا، جہاں سے دونوں کی لاشیں برآمد کر لی گئیں۔یہ افسوسناک واقعہ اسلام آباد میں شہریوں کو درپیش موسمی خطرات اور نکاسی آب کے ناقص انتظامات کی نشاندہی کرتا ہے، جس پر فوری توجہ دینے کی ضرورت ہے۔
ریسکیو ٹیموں کو گزشتہ روز گاڑی کا بمپر اور سائیڈ مرر ملے تھے تاہم گاڑی کا کچھ پتہ نہیں چل سکا تھا۔
اب ریسکیو ٹیموں کو دریائے سواں سے بہہ جانے والے کرنل ریٹائرڈ اسحاق اور ان کی بیٹی کی لاش مل گئی ہے ۔
