اسلام آباد (این این آئی)اسلام آباد کے زکو فنڈ میں کروڑوں روپے کے غبن کا انکشاف ہوا ہے، انکوائری کمیٹی نے بدعنوانی میں ملوث اہلکاروں کے خلاف کارروائی کی سفارش کی ہے ۔ذرائع کے مطابق 185زکوة کمیٹیوں کے متعدد چیئرمین بھی مبینہ طور پر غبن میں ملوث ہیں، غریب اور نادار افراد کے فنڈ میں کرپشن کی انکوائری اکتوبر 2024میں شروع ہوئی۔ابتدائی انکوائری رپورٹ وزارت داخلہ کو بھجوادی گئی ہے، انکشاف ہوا ہے کہ متعدد زکوة کمیٹیوں کا ریکارڈ ہی غائب کردیا گیا ہے۔

ابتدائی رپورٹ میں زکوة فنڈ کو شفاف بنانے کیلئے تجاویز بھی دی گئی ہیں، ان میں ایڈمن آفیسر، اسٹینوٹائپسٹ کو سروس سے برطرف کرنے کی تجویز بھی شامل ہے۔تجویز دی گئی کہ نادرا کے بائیو میٹرک ریکارڈ کے ذریعے مستحق افراد کو زکو فراہم کی جائے،کرپشن کی رقم کا تعین کرنے کیلئے مزید تحقیقات کی تجویز بھی انکوائری رپورٹ میں شامل ہے۔اس بارے میں چیف کمشنر اسلام آباد محمد علی رندھاوا نے کہا ہے کہ معاملہ ایف آئی اے کو بھی بھیج دیا گیا ہے۔