کابل /اسلام آباد (این این آئی)طالبان حکومت نے طالبات کو تعلیم کی غرض سے پاکستان جانے کی اجازت دیدی تاہم انہیں محرم کیساتھ رہنا ہوگا۔غیر ملکی میڈیا کے مطابق طالبان حکومت نے افغان طالبات کو پاکستان میں اعلی تعلیم حاصل کرنے کی اجازت دینے پر رضامندی ظاہر کردی،تاہم شرط عائد کی ہے کہ طالبات کیساتھ ان کے محرم کو بھی پاکستان کا ویزا دیا جائے تاکہ یہ طالبات محرم کے ساتھ رہ سکیں۔
افغانستان کیلئے پاکستان کے خصوصی ایلچی محمد صادق نے بتایا کہ 21 ہزار طلبا نے آئندہ تعلیمی سیشن کیلئے علامہ اقبال سکالرشپس کیلئے درخواستیں دی ہیں جن میں 5ہزار افغان طالبات شامل ہیں۔یہ سکالرشپ پروگرام مکمل طور پر فنڈڈ ہے جس کا مقصد 2ہزار طلباء کو بیرون ملک بھیجنا ہے جس میں دستیاب جگہوں میں سے ایک تہائی خواتین کیلئے مختص ہیں۔علامہ اقبال سکالرشپ طب، انجینئرنگ، زراعت اور کمپیوٹر سائنس جیسے شعبوں میں دی جا رہی ہے۔طالبان کے 2021ء میں افغانستان کا اقتدار سنبھالنے کے بعد سے یہ پروگرام تعطل کا شکار تھا۔
