اسلام آباد (این این آئی) نیشنل چائلڈ رائٹس کمیشن کے مطابق پاکستان میں 2کروڑ 60لاکھ سے زائد بچے اس وقت سکولوں سے باہر ہیں۔قومی اسمبلی کی قائمہ کمیٹی میں اعداد وشمار پیش کرتے ہوئے نیشنل چائلڈ رائٹس کمیشن نے بتایا کہ ملک میں اس وقت ڈھائی کروڑ سے زائد بچے سکولوں سے باہر ہیں۔بریفنگ میں بتایا بچوں کے ساتھ زیادتی مار پیٹ کا سرکاری اداروں سے مستند ڈیٹا نہیں ملتا، جبکہ سوشل میڈیا پلیٹ فارم پر بچوں کی تصاویر کی حفاظت کیلئے قومی کمیشن برائے حقوق اطفال میٹا کے ساتھ مل کر کام کر رہا ہے۔

کمیٹی میں پی ٹی آئی کے شیر افضل مروت کو بات کرنے پر (ن) لیگ کی نوشین افتخار نے ٹوکتے ہوئے کہا کہ ایجنڈے سے نہ ہٹیں۔ سیاسی تعصب کا شکار ہونے کے بجائے بچوں کے حقوق کی بات کی جائے۔علی محمد خان نے انسانی حقوق سے متعلق حکومت کو غیر سنجیدہ قرار دیا تو کمیٹی چیئرمین حامد رضا نے قیدیوں کے حالات جاننے کیلئے 8جنوری کو اڈیالہ جیل جانے کا اعلان کردیا۔انسانی حقوق کمیٹی نے سکولوں میں منشیات کے استعمال اور بچوں سے بھیک منگوانے سے متعلق آئندہ اجلاس میں تفصیلات پیش کرنے کا حکم بھی دے دیا۔