ساہیوال (این این آئی)ساہیوال میں گھریلو تنازعہ پر سسرالیوں نے بیٹی کے سامنے بہو کو آگ لگا کرقتل کردیا، وزیراعلی پنجاب مریم نوازنے واقعہ کانوٹس لے کر ریجنل پولیس آفیسرسے رپورٹ طلب کرلی ہے۔تفصیلات کے مطابق ساہیوال کے نواحی گائوں آر 108، سیون میں ایک بچی کی ماں ام کلثوم کوسسرالیوں نے گھریلو تنازعہ پر آگ لگا دی ، خاتون کو تشویشناک حالت میں ٹیچنگ ہسپتال پہنچایاگیا، جہاں حالت تشویشناک ہونے پر اسے لاہورریفرکیاگیا تاہم وہ راستے میں ہی جان کی بازی ہارگئی ۔

ام کلثوم کا ساہیوال ٹیچنگ ہسپتال میں پوسٹ مارٹم کیا گیا جس کے بعد میت ورثا کے حوالے کردی گئی، مقتولہ کو والدین کے گائوں میں سپردخاک کردیا گیا۔دوسری جانب پولیس نے ورثاء کی درخواست پر 2خواتین سمیت 3افرادکے خلاف مقدمہ درج کر لیا ہے۔پولیس ترجمان کے مطابق ملزمان ضمانت قبل ازگرفتاری کرواچکے ہیں ، مقدمہ کی شفاف تحقیقات جاری ہیں، تفتیش جلد مکمل حقائق سامنے لائیں گے ۔علاوہ ازیں وزیراعلی پنجاب مریم نواز نے واقعہ کا نوٹس لیتے ہوئے آر پی او ساہیوال سے رپورٹ طلب کرکے فوری انصاف فراہم کرنے کا حکم دیا ہے۔