اسلام آباد (این این آئی)اسلام آباد میں بینکوں میں ڈکیتی کرنیوالے ملزم کو گرفتار کرلیا گیا، ملزم نے فلموں سے متاثر ہو کر وارداتیں کرنے کا اعتراف کرلیا ۔ ڈی آئی جی اسلام آباد سید علی رضا نے بتایا ہے کہ اسلام آباد کے بینکوں میں ڈکیتی کرنے والے ملزم کو گرفتار کر لیا گیا، گرفتار ڈکیت کا تعلق سرگودھا سے ہے جس سے تمام سامان بھی برآمد کر لیا گیا۔

ڈی آئی جی کے مطابق گزشتہ 3ماہ کا ڈیٹا 3دن میں چیک کیا گیا، سائبر انویسٹی گیشن اور ڈیجیٹل سرویلنس سے مدد ملی، ملزم 4، 5 سال سے اسلام آباد میں الیکٹریشن کا کام کر رہا تھا۔انہوں نے بتایا کہ ملزم کے قبضہ سے اسلحہ، کیش ڈکیتی میں استعمال موٹر سائیکل بھی برآمد کرلی گئی۔ ڈی آئی جی نے بتایا کہ ملزم ریکارڈ یافتہ ہے،پنجاب میں جیل بھی جا چکا ہے، ملزم کی جانب سے ایک دن میں دو دو مقامات پر فائرنگ بھی کی گئی، ملزم نے اعتراف کیا ہے کہ فلموں سے متاثر ہو کر وارداتیں کیں۔