لاہور ( این این آئی)صوبائی وزیر صحت خواجہ سلمان رفیق نے مقامی ہوٹل میں انٹر فیتھ لیڈر شپ میٹ اپ میں خصوصی شرکت کی۔معروف عالم دین ڈاکٹر ذاکر نائیک نے بطور مہمان خصوصی شرکت کی۔ اس موقع پر سیکرٹری اوقات ڈاکٹر سید طاہر رضا بخاری اور علماء و مشائخ کی کثیر تعداد نے شرکت کی۔ انٹر فیتھ لیڈر شپ میٹ اپ کا انعقاد خطیب امام بادشاہی مسجد و چیئرمین رویت ہلال کمیٹی مولانا عبدالخبیر آزاد نے کیا۔ ڈاکٹر ذاکر نائیک نے علماء و مشائخ سے اپنے خطاب میں کہا کہ پاکستان میں امن اور محبت کا پیغام لے کر آئے ہیں۔ پاکستانی عوام سے سوچ سے بڑھ کر محبت ملی ہے۔
انہوں نے کہاکہ ہمیں خدا اور اس کے آخری رسول صلی اللہ علیہ وآلہ وسلم کا پیغام پوری دنیا میں پھیلانا چاہئے۔ ڈاکٹر ذاکر نائیک نے علماء و مشائخ کی خوبصورت محفل سجانے کیلئے مولانا عبدالخبیر آزاد اور ان کی ٹیم کو مبارکباد پیش کی۔صوبائی وزیر صحت خواجہ سلمان رفیق نے علماء و مشائخ سے اپنے خطاب میںکہاکہ ڈاکٹر ذاکر نائیک پوری دنیا میں دین اسلام کی دعوت میں پیش پیش ہیں۔ڈاکٹر ذاکر نائیک سے ملنے اور ان خیالات سے مستفید ہونے کا اشتیاق پورا ہوا ہے۔خواجہ سلمان رفیق نے کہاکہ اللہ تعالیٰ کے سیدھے راستے پر چلنے والے کو کوئی مشکل پیش نہیں آتی۔ اللہ تعالیٰ کے فضل و کرم سے پنجاب کی عوام کی خدمت کر رہے ہیں۔
پاکستان کیلئے میرے خاندان کی خدمات بارے سارے احباب واقف ہیں۔ صوبائی وزیرصحت خواجہ سلمان رفیق نے کہاکہ حکومت پنجاب نے ڈاکٹر ذاکر نائیک کو ویلکم کیا ہے۔ ڈاکٹر ذاکر نائیک نے پاکستان میں محبت کا پیغام دیا ہے۔خطیب امام بادشاہی مسجد مولانا سید عبدالخبیر آزاد نے کہاکہ ہم معروف عالم دین ڈاکٹر ذاکر نائیک کو پاکستان کے دل لاہور میں خوش آمدید کہتے ہیں۔ سیکرٹری اوقاف ڈاکٹر سید طاہر رضا بخاری نے کہاکہ ڈاکٹر ذاکر نائیک کی تقاریب کے کامیاب انعقاد پر حکومت پنجاب اور صوبائی وزیر صحت خواجہ سلمان رفیق کو کریڈٹ دیتا ہوں۔ آج امت مسلمہ کو بہت چیلنجز درپیش ہیں۔ ڈاکٹر سید طاہر رضا بخاری نے امن و امان کی فضاء برقرار رکھنے میں خواجہ سلمان رفیق کی کاوشوں کو سراہا۔
