اسلام آباد(این این آئی)وفاقی وزیر داخلہ رانا ثناء اللہ خان نے کہا ہے کہ شہداء کی یادگاروں کی بے حرمتی کی گئی،شہدا کے مجسموں کو توڑا گیا،سرکشی اور بغاوت کرنے والوں کو سیاست کرنے کا کوئی حق نہیں،کرپشن ختم کرنے کے دعویداروں نے خود کرپشن کی، آڈیوز اور ویڈیوز والوں کو کسی صورت معافی نہیں ملے گی۔
پریس کانفرنس سے خطاب کرتے ہوئے وزیر داخلہ نے کہاکہ پی ٹی آئی والوں نے 50لاکھ گھر اور ایک کروڑ نوکریوں کے جھوٹے وعدے کیے،کرپشن ختم کرنے کے دعویداروں نے خود کرپشن کی۔ وفاقی وزیر داخلہ نے کہا کہ ہم نے ایک سال میں ترقیاتی منصوبوں کو دوبارہ شروع کیا،پی ٹی آئی والوں نے صرف باتیں ہی کیں، عملی طور پر کچھ بھی نہیں کیا۔ رانا ثنا اللہ خان نے کہاکہ ہم ہر قیمت پر ریاست کی رٹ کو قائم کریں گے، آڈیوز اور ویڈیوز والوں کو کسی صورت معافی نہیں ملے گی۔انہوں نے کہا کہ سرکشی اور بغاوت کرنے والوں کو سیاست کرنے کا کوئی حق نہیں۔
