مکوآنہ (این این آئی) معروف مذہبی اسکالر مولانا طارق جمیل نے پاکستان تحریک انصاف کے لوگوں کو مشورہ دیا ہے کہ وہ تبلیغ میں وقت لگائیں اور چیئرمین پاکستان تحریک انصاف عمران خان کو بھی ساتھ لے جائیں اس عمل سے ان کو بہت فائدہ ہوگا۔

تفصیلات کے مطابق سوشل میڈیا پر ایک ویڈیو وائرل ہے جس میں مولانا طارق جمیل نے پاکستانی سابق وزیرِ اعظم عمران خان کو مشورہ دیتے ہوئے قہقہے لگا دیے۔وائر ل ویڈیو میں مولانا طارق جمیل عمران خان کو ایک مشورہ دے رہے ہیں جس کے بعد وہ زور سے ہنستے ہوئے بھی سنائی دیتے ہیں۔انہوں نے اپنے خطاب کے دوران لوگوں سے مخاطب ہوتے ہوئے کہا کہ تمام پاکستان تحریکِ انصاف کے کارکنان تین تین دن تبلیغ پر چلے جائیں اور اپنے ہمراہ عمران خان کو بھی لے جائیں، اس سے آپکو بہت فائدہ ہوگا۔مولانا طارق جمیل ان تین جملوں کی ادائیگی کے بعد قہقہے لگاتے ہیں اور سامنے بیٹھے افراد کو ہنستے ہوئے دیکھتے رہتے ہیں۔واضح رہے کہ طارق جمیل کافی عرصے سے عمران خان کی حمایت کی وجہ سے مسلسل تنقید کا نشانہ بنتے آ رہے ہیں اور ایک موقع پر تو انہیں عمران خان کی حمایت کی وجہ سے قوم سے معافی بھی مانگنی پڑ گئی تھی۔