اسلام آباد (این این آئی)اسلام آباد کی مقامی عدالت نے دس دس ہزار روپے مچلکوں کے عوض 29 مئی تک اسدقیصر اور انور تاج کی ضمانت منظور کرلی۔پیر کو سابق وزیر اعظم عمران خان کی گرفتاری پر احتجاج کرنے کے خلاف اسدقیصر اور ملک انور تاج کے خلاف کیس کی سماعت ایڈیشنل سیشن جج طاہرعباس سپرا نے کی ۔

پی ٹی آئی رہنما اسدقیصر اور انور تاج اپنے وکیل شیرافضل مروت کے ہمراہ عدالت پیش ہوئے ۔اسدقیصر اور انور تاج نے درخواستِ ضمانت دائر کردی ۔وکیل شیر افضل مروت نے کہا کہ تحریک انصاف کے رہنماؤں کے لیے حالات کافی گھمبیر ہیں ،ضمانت منظور کرکے آگلی تاریخ لمبی دے دیں،عدالت نے اسدقیصر اور انور تاج کو شامل تفتیش ہونے کا حکم دیتے ہوئے اسد قیصر کو ہدایت کی کہ خان صاحب شامل تفتیش ہوجائیں، عدالت نے ریمارکس دئیے کہ پھر میں نے خان صاحب کہہ دیا، جج نے مکالمہ کرتے ہوئے کہا کہ شیرافضل مروت نے آپ سے فیس تو نہیں لی؟ اسد قیصر نے بتایا کہ وکیل مجھے چائے بھی پلا رہے اور برگر بھی کھلا رہے، وکیل شیر افضل مروت نے کہا کہ اسدقیصر کا وکیل بننا سعادت کی بات ہے۔عدالت نے ریمارکس دیے کہ اللہ آپ کو ایسی سعادت بار بار دے ۔عدالت نے دس دس ہزار روپے مچلکوں کے عوض 29 مئی تک اسدقیصر اور انور تاج کی ضمانت منظور کرلی ۔پی ٹی آئی رہنما اسدقیصر اور ملک انور تاج کے خلاف تھانہ سنگجانی میں مقدمہ درج ہے۔