لاہور ( این این آئی) لاہور ہائیکورٹ نے ظل شاہ قتل کیس میں چیئرمین تحریک انصاف عمران خان کی 2 جون تک عبوری ضمانت منظور کر لی۔جسٹس انوار الحق پنوں نے عمران خان کی عبوری ضمانت کی درخواست پر اعتراضات ختم ہونے کے بعد سماعت کی۔چیئرمین پی ٹی آئی کے وکیل نے دلائل دیتے ہوئے کہا کہ عمران خان کو لاڈلہ کہتے ہیں لیکن وہ آج بھی 5مقدمات میں ضمانت کے لئے عدالتوں میں پیش ہوئے۔
بعد ازاں عدالت نے ایک لاکھ روپے کے مچلکوں کے عوض چیئرمین تحریک انصاف عمران خان کی 2 جون تک عبوری ضمانت منظور کر لی۔قبل ازیں سابق وزیراعظم عمران خان نے اپنے وکیل بیرسٹر سلمان صفدر کی وساطت سے لاہور ہائیکورٹ میں عبوری ضمانت کی درخواست دائر کی تھی۔درخواست میں موقف اختیار کیا گیا ہے کہ تھانہ سرور روڈ پولیس نے بے بنیاد اور جھوٹا مقدمہ درج کیا ہے، حکومت کی جانب سے سیاسی انتقام کا نشانہ بنایا جا رہا ہے۔عمران خان نے درخواست میں استدعا کی کہ لاہور ہائیکورٹ عبوری ضمانت منظور کرنے کا حکم دے۔چیئرمین تحریک انصاف عمران خان کی ظل شاہ قتل کیس میں عبوری ضمانت پرہائیکورٹ آفس نے اعتراض عائد کردیا تھا ۔رجسٹرارآفس کی جانب سے اعتراض لگایا گیا ہے کہ عمران خان عبوری ضمانت کیلئے سیشن کورٹ رجوع کیے بغیر ہائیکورٹ کیوں آئے؟ ۔ہائیکورٹ کے جسٹس علی ضیا باجوہ نے ظل شاہ قتل کیس میں عمران خان کی عبوری ضمانت کی درخواست سننے سے معذرت کرلی تھی ۔ عمران خان جسٹس علی ضیا باجوہ کی عدالت میں پیش ہوئے۔ جسٹس علی ضیا باجوہ نے ذاتی وجوہات کی بنا پر کیس سننے سے معذرت کرلی۔ جسٹس علی ضیا باجوہ نے درخواست کسی اور بنچ کے سامنے فکس کرنے کیلئے فائل چیف جسٹس کو بھجوا دی تھی۔
