لاہور ( این این آئی)لاہور ہائیکورٹ نے سنیارٹی کی بنیاد پر آرمی چیف کے تقرر کیلئے دائر درخواست ناقابل سماعت قرار دیتے ہوئے کہا ہے کہ سنیارٹی والا معاملہ انتہائی اہم ہے ،درخواست گزار سپریم کورٹ سے رجوع کرے ۔گزشتہ روز لاہور ہائیکورٹ کے

معزز جسٹس فیصل زمان خان نے درخواست پر سماعت کی ۔درخواست نجمہ احمد ایڈوکیٹ نے طارق عزیز کی ایڈوکیٹ کی وساطت سے دائر کی جس میں وفاقی حکومت، سیکرٹری قانون اور اعتزاز احسن سمیت دیگر کو فریق بنایا گیا ۔درخواست میں موقف اختیار کیا گیا کہ موجودہ آرمی چیف 29 نومبر کو ریٹائر ہو رہے ہیں۔وفاقی حکومت نئے آرمی چیف کی تقرری قانون کے مطابق کرنے کی پابند ہے،وزارت دفاع کی جانب سے تجویز کردہ ناموں میں سے آرمی چیف مقرر کرنے کا اختیار وزیراعظم کو ہے۔معزز عدالت سے استدعا ہے کہ سینئر ترین فوجی افسر کونیا آرمی چیف مقرر کرنے کا حکم دیا جائے ۔ تاہم عدالت عالیہ نے آرمی چیف کی سنیارٹی کے مطابق تقرری کے لیے درخواست ناقابل سماعت قرار دیدی ۔ جسٹس فیصل زمان نے کہا کہ سنیارٹی والا معاملہ انتہائی اہم ہے ، درخواست گزار سپریم کورٹ سے رجوع کرے ،سپریم کورٹ کا فل کورٹ آرمی چیف کی سنیارٹی کے مطابق تقرری کے لیے کیس سن سکتا ہے ۔