لاہور( این این آئی)لاہور کی سیشن عدالت نے لانگ مارچ کے دوران توڑ پھوڑ اور پولیس پر تشدد سمیت تین مختلف مقدمات میں تحریک انصاف کے رہنما شفقت محمود کی ایک روزہ حاضری معافی کی درخواست منظور کرتے ہوئے آئندہ سماعت پر طلب کرلیا۔

ایڈیشنل سیشن جج صائمہ قریشی، صائمہ حسنین اور ایڈیشنل سیشن جج محمد احمد حسنین نے شفقت محمود کے خلاف تین مختلف مقدمات میں عبوری ضمانت پر سماعت کی۔شفقت محمود کے وکلا ء نے حاضری معافی کی درخواست دائر کی اور موقف اپنایا کہ شفقت محمود اسلام آباد میں سیاسی مصروفیت کے باعث عدالت پیش نہیں ہو سکتے، عدالت ایک دن کی حاضری معافی منظور کرے۔جس پر عدالت نے تھانہ شفیق آباد میں درج مقدمہ میں شفقت محمود کی عبوری ضمانت پر سماعت 6 اگست تک توسیع کا حکم جاری کر دیا جبکہ تھانہ اسلامپورہ اور فیکٹری ایریا میں درج مقدمات میں شفقت محمود کی عبوری ضمانت میں 5 اگست تک توسیع دیدی گئی ۔سیشن کورٹ نے الگ الگ مقدمات میں پچاس ، 50 ہزار کے مچلکے جمع کرانے کا حکم بھی دیا۔ عدالت نے پولیس کو شفقت محمود کی گرفتاری سے روکتے ہوئے متعلقہ پولیس اسٹیشنز سے مقدمات کا مکمل ریکارڈ طلب کر لیا۔