اسلام آباد (این این آئی)سابق وزیراعظم اور پاکستان مسلم لیگ کے مرکزی صدر چوہدری شجاعت حسین سے مسلم لیگ (ق )امریکہ کے صدر میاں ذاکر نسیم نے ان کی رہائش گاہ پر ملاقات کی۔ م
لاقات میں ان کے صاحبزادے پاکستان کبڈی فیڈریشن کے صدر چوہدری شافع حسین اور وفاقی وزیر برائے سرمایہ کاری بورڈ چوہدری سالک حسین بھی موجود تھے۔ ملاقات میں پارٹی امور اور قومی معاملات کے حوالے سے تفصیلی طور پر تبادلہ خیال کیا گیا۔ دوران گفتگو چوہدری شجاعت حسین نے کہا کہ اوورسیز پاکستانی ملکی معیشت کی مضبوطی میں کلیدی کردار ادا کر رہے ہیں، تارکین وطن پاکستان کا اثاثہ ہیں، یہ لوگ دیارِغیر میں دن رات محنت اور جدوجہد کر کے قیمتی زرمبادلہ ملک پاکستان کو بھجواتے ہیں اور ملک کی ترقی میں بڑھ چڑھ کر حصہ لیتے ہیں۔ انہوں نے کہا کہ اوورسیز پاکستانی محب وطن اور باصلاحیت ہیں جن کی بدولت دنیا میں پاکستان کا نام روشن ہو رہا ہے۔ چوہدری شجاعت حسین نے امریکہ میں مسلم لیگ ق کی مضبوطی اور بہتری کیلئے میاں ذاکر نسیم کو ہدایات بھی جاری کیں۔
