اسلام آباد(این این آئی)وزیر داخلہ رانا ثناء اللہ نے جامعہ کراچی دھماکے کے مجرموں کو گرفتار کرنے اور عبرت کا نشان بنانے کے عزم کا اظہار کرتے ہوئے کہاہے کہ پورا پاکستان اپنے چینی بھائیوں سے بھرپور یک جہتی کرتا ہے، یہ ہمارا مشترکہ غم ہے ،پاک چین دوستی پر حملہ ہوا ہے، پوری قوت سے نمٹیں گے۔ اپنے بیان میں انہوںنے کہاکہ دورہ کراچی کے دور ان متعلقہ حکام سے ملاقات کرکے حقائق معلوم کروں گا۔ وزیر داخلہ نے کہاکہ دہشت گردی میں تحقیقات سے عظیم دوست چین کو مکمل طور پر آگاہ رکھیں گے۔ وزیر داخلہ نے کہاکہ چینی باشندوں کی سکیورٹی کے تمام آپریٹس کا ازسرنو جائزہ لیں گے،سکیورٹی کے مکمل جائزے کے بعد موثر اقدامات کریں گے ۔ انہوںنے کہاکہ باریک بینی سے ہر پہلو کی جانچ کریں گے،مجرموں کو قانون کے کٹہرے میں لانے کے لئے وفاقی حکومت بھرپور تعاون کرے گی۔