مریدکے ( این این آئی)وفاقی وزیر تعلیم رانا تنویر حسین نے کہا ہے صدر مملکت کے خلاف مواخذے کی تحریک پر غور کیا جاسکتا ہے ،عدم اعتماد کی تحریک کے دوران صدر نے کئی غیر آئینی کام کئے جس کے ثبوت موجود ہیں۔مسلم لیگ (ن)کے ضلعی نائب صدر

حافظ احمد عتیق اور چوہدری سلیم گجر آف کھوڑی سیٹھ مبشر کے ڈیرہ پر گفتگو کرتے ہوئے انہوں نے کہا کہ عمران خان ضرور لانگ مارچ کریں اورسڑکوں پر آئیں لیکن وہ قوم کو کوئی جواز بھی تو بتائیں ۔انہوں نے کہا ہم نے نہیں کہا کہ امریکی خط جعلی ہے بلکہ ہم کہتے ہیں جو خط عمران خان لئے پھرتے ہیں اس میں اضافہ کیا گیا ،جس کو یہ سازش کہتے ہیں عسکری قیادت اور دیگر اداروں نے بھی کہا کہ کوئی سازش نہیں ہوئی ،سازش یہ ہے ان کے پاس 172ارکان نہیں تھے اور انہیں آئینی طریقے سے نکالا گیا ہے ۔انہوں نے کہا پیپلز پارٹی ہماری سب سے بڑی اتحادی ہے آنے وقت میں بھی ہم اتحادیوں کے ساتھ مل کر ملک کے معاملات چلائیں گے ۔ انہوں نے کہا کہ نواز شریف کی دعوت پر پیپلز پارٹی قیادت لندن گئی ، مجھے میثاق جمہوریت ٹو کا علم نہیں ۔جب ان سے سوال کیا گیا کیا آصف علی زرادری کو مسلم لیگ (ن)سمیت دیگر اتحادی صدر پاکستان مانیں گے تو انہوںنے کہا کہ جب صدر پاکستان کا عہدہ خالی ہوگا تو مشاورت کریں گے ۔انہوں نے کہا نواز شریف کا قوم بیتابی سے انتظار کررہی ہے ،جب ڈاکٹر انہیں سفر کی اجازت دیں گے وہ وطن واپس آجائیں گے ۔انہوں نے کہا تعلیم کے شعبے میں بہت کام کرنے کی ضرورت ہے ،اس وقت لٹریسی ریٹ 70فیصد ہے وقت گو کہ قلیل ہے مگر اسے99فیصد تک لے کر جانا ہے ۔