کراچی (این این آئی)جمعیت علمائے اسلام ضلع کورنگی کے امیر مفتی عبدالحق عثمانی، جنرل سیکریٹری قاری فیض الرحمن عابد، اراکین مجلس عاملہ مولانا محمد طاہر ارکانی، مولانا محمد صابر اشرفی، قاری خطیب شاہ، مولانا محمد فاروق خلیل، مولانا محب اللہ، قاری گل محمد علی زئی
، حافظ سعید الاسلام ،رمضان ایڈوکیٹ ودیگرنے اپنے مشترکہ بیان میں عظیم ایٹمی سائنسدان ،محسن پاکستان ڈاکٹر عبدالقدیر خان کی رحلت کو قومی سانحہ قرار دیتے ہوئے کہا ہے کہ وہ ایک محب وطن پاکستانی تھے جنہوں نے ایٹمی پروگرام کے ذریعے من حیث المجوع پوری پاکستانی قوم پر احسان کیا ہے۔ قوم کے دفاع کو ناقابل تسخیر بنانے کے لیے ان کی گراں قدر خدمات ہمیشہ یاد رکھی جائیں گی۔ قوم کا بچہ بچہ ان کا ہمیشہ مقروض رہے گا۔ آج ان ہی کی قربانیوں اور محنت شاقہ کے باعث پوری امت مسلمہ کو فخر ہے کہ ان کی قیادت کرنے والے ملک کے پاس ایٹمی قوت موجود ہے۔ اس صلاحیت کی بنیاد پرلشکران کفار نہ صرف پاکستان بلکہ مسلم امت مسلمہ سے بھی خوفزدہ ہیں۔اس موقع پرجے یوآئی کے رہنمائوں کی جانب سے ڈاکٹر عبدالقدیر خان کی مغفرت کے لیے دعا بھی کی گئی۔
