اسلام آباد (مانیٹرنگ ڈیسک )عدالت میں نقیب اللّٰہ قتل کیس کی سماعت کے وقت اصل دستاویزات غائب ہونے کا انکشاف ۔ تفصیلات کے مطابق انسداد دہشت گردی کی عدالت میں دوران سماعت سابق ایس ایس پی ملیر راؤ انوار اور ڈی ایس پی قمر سمیت دیگر ملزمان پیش ہوئے ۔مدعی نے مقدمے کی دستاویزات کی نقول سے متعلق درخواست جمع کروادی۔نجی ٹی وی جیو کے مطابق وکیل مدعی نے کہا کہ کیس کی اصل دستاویزات کھوگئی ہیں، اس لیے فوٹو کاپی کو ہی حصہ بنایا جائے۔ملزمان کے وکیل نے اس پر جرح کرتے ہوئے کہا کہ یہ فوٹو کاپی دستاویزات قابل قبول نہیں ہیں، یہ دستاویزات ٹیمپر بھی کی جاسکتی ہیں۔کیس کی سماعت کے دوران وکلاء نے دلائل مکمل کرلیے ہیں جس کے بعد عدالت نے دستاویزات سے متعلق فیصلہ محفوظ کرلیا۔عدالت نے حکم دیا کہ آئندہ سماعت پر گواہوں کو بھی پیش کیا جائے، جس کے بعد درخواست پر فیصلہ سنایا جائے گا۔عدالت نے نقیب اللّٰہ قتل کیس کی مزید سماعت 8 جولائی تک ملتوی کردی ہے۔