اسلام آباد (این این آئی) جمعیت علمائے اسلام (ف) نے وزیراعظم عمران خان کے دورہ سعودی عرب پر رد عمل کا اظہار کرتے ہوئے کہاہے کہ کشکول کے طعنے دینے والوں نے سب سے بڑا کشکول اٹھالیا۔اپنے بیان میں اسلم غوری نے کہاکہ ملکی معیشت تباہ کرچکے ،ترقی کی شرح منفی میں چلی گئی ،مہنگائی زوروں پر ہے ،مانگ تانگ کر کب تک گذارہ کریں گے ؟۔ انہوں نے کہاکہ ہر گذرتے دن کے ساتھ ملکی معیشت تباہی کے گڑھے میں گر رہی ہے۔انہوں نے کہاکہ سعودی عرب کے ساتھ برادرانہ تعلقات ہیں ،نااہل سرکار نے ان دیرینہ تعلقات پر
بھی وار کیا۔انہوں نے کہاکہ دوسوارب روپے بیرون ملک سے آنے کی خوشخبریاں سنانے والے اب زکواۃ ،فطرانہ اور صدقہ اکٹھا کرررہے ہیں۔انہوں نے کہاکہ ملک کو آئی ایم ایف کے پاس گروی رکھ کر اب دنیا بھر سے چندے مانگنے پر لگ گئے ہیں۔انہوں نے کہاکہ سابق وزراء اعظم کے بیرونی دوروں پر اعتراض کرنے والے خود مشیروں ،وزراء اور دوستوں کی فوج ظفر موج لے کر گئے ہیں۔انہوں نے کہاکہ نالائقوں نے پورے ملک کو خیراتی بنا دیا۔ انہوں نے کہاکہ بیرونی دنیا بھی جان چکی ہے کہ موجودہ وزیر اعظم سلیکٹڈ ہے۔
