کراچی (مانیٹرنگ +آن لائن) این اے 249 ضمنی الیکشن، ووٹوں کی دوبارہ گنتی کا نتیجہ جاری کر دیا گیا،دوبارہ گنتی کے دوران پاکستان پیپلز پارٹی کے امیدوار قادر مندوخیل 15ہزار656 ووٹ لیکر کامیاب ہوئے، جبکہ ن لیگ کے مفتاح اسماعیل نے14ہزار747 ووٹ حاصل کیے۔اس طرح پیپلز پارٹی کے ووٹوں میں مزید اضافہ ہو گیا ہے۔

دوسری جانب پیپلزپارٹی کے رُکن صوبائی اسمبلی عبدالجبار خان نے کہا ہے کہ کراچی کے حلقہ این اے 249 میں پیپلزپارٹی کی کامیابی دیگر جماعتوں کو ہضم نہیں ہورہی اور وہ بلاجواز نتائج کو متنازعہ بنانے کی کوشش کررہی ہے جبکہ کراچی کے عوام نے پیپلزپارٹی کی کارکردگی اور جمہوریت دوستی کو دیکھتے ہوئے پیپلزپارٹی کے امیدوار کو کامیاب کرایا ۔ انہوں نے کہاکہ کراچی میں پیپلزپارٹی کی بڑھتی ہوئی مقبولیت سے خائف ہوکر کچھ قوتیں اوچھے ہتھکنڈے پر اُتر آئی ہے لیکن انہیں معلوم ہونا چاہئے کہ کراچی کے شہری پیپلزپارٹی کے ساتھ ہیں اور اب کراچی بھی ذوالفقار علی بھٹو کے چاہنے والوں کا شہر ہوگا۔ انہوں نے کہاکہ کراچی کے حلقے این اے 249 کے نتائج کو کھلے دل کے ساتھ تسلیم کیا جائے ۔ پیپلزپارٹی نے بھی ہمیشہ پورے ملک سے آنے والے نتائج کو کھلے دل اور کھلے ذہن سے تسلیم کیا ہے۔ انہوں نے کہاکہ آنے والے انتخابات میں پیپلزپارٹی نہ صرف سندھ سے سوئپ کرے گی بلکہ ملک کے دیگر صوبوں سے بھی بھاری اکثریت میں کامیابی حاصل کرکے ملک میں حکومت بنائے گی کیونکہ عوام یہ جانتے ہیں کہ انہیں سب سے زیادہ ریلیف پیپلزپارٹی کے دور میں ہی ملتا ہے اور پیپلزپارٹی اقتدار میں آکر نوجوانوں کو روزگار، تعلی، صحت سمیت دیگر سہولیات فراہم کرتی ہے جبکہ دیگر جماعتوں نے اقتدار میں آکر سب سے پہلے لوگوں کا روزگار چھینا ، انہیں مہنگائی اور فاقہ کشی میں مبتلا کیا ، موجودہ حکومت بھی اسی پالیسی پر گامزن ہے۔