لاہور( این این آئی )مسلم لیگ (ن) کی نائب صدر مریم نواز کی جانب سے سوشل میڈیا پر افطار کے مشروب میں پودینے کے چند پتے اور برف کے ٹکڑے ڈالنے کا مشورہ دیا جسے جہاں ان کے مداحوںنے بیحد پسند کیا وہیں مخالفین نے سیاسی ذائقے سے چکھا۔سوشل میڈیا پر کسی نے پاکستان کے دو معروف مشروبات کے بارے کہا کہ تین دہائیوں سے ان مشروبات میں لیموں کا رس ڈال کر پینے کا اپنا لاجواب
و لازوال مزہ ہے۔اس ٹوئٹ پر مریم نواز نے کہا کہ ان مشروبات میں پودینے کے چند پتے اور برف کے ٹکڑے بھی ڈال کر پئیں، مریم کے ری ٹوئٹ پر ان کے فالورز اور مخالفین کے رس بھرے اور زہر بھرے جوابات کا تانتا بند گیا۔کسی نے کہا کہ چلو اب آج سے اس مشروب میں پودینہ ڈال کر پینا بھی شروع، میم کی پسند ہماری خواہش، تو کوئی بولا پہلے مشروب مشرق، اب مشروب مریم، جیتی رہیں، خوش رہیں اور آگے بڑھ کر قیادت کریں، ہمارے ملک میں اسٹرکچرل تبدیلی اب اپنے منطقی انجام کو پہنچنے کو ہے۔کسی نے ہاں میں ہاں ملاتے ہوئے کہا کہ میم آپ بالکل صحیح کہتی ہیں، پودینہ تیزابیت اور معدے کی جلن کو ختم کرتا ہے اور ہاضمے کے لیے اچھا ہے، تو کوئی پکارا میم آپ سیاسی سرگرمیاں جاری رکھیں، عوام سے صرف مہنگای کم کرنے اور کشمیر پر بات کریں، آپ میں دم ہے، آپ دنیا کے سامنے ڈٹ کر کشمیر کا مسئلہ حل کروا سکتی ہیں۔ایک فالور نے کچوکا دیا کہ یہ مشروب سب روزہ داروں کے لیے ہے، اعلی تربیت یافتہ بے شعور اور حسد سے بھرپور قوم یوتھ صرف اپنے لیڈر کی جھوٹی تقریروں سے پیاس بجھایا کریں۔
مریم نواز کے مخالفین نے بھی مریم کی رمضان ریسیپی میں اپنی سیاسی کڑواہٹ گھولنے کی بھر پور کوشش کی۔کسی نے انہیں مشورہ دیا کہ آپ یہ مشروب باقاعدہ پئیں تاکہ آپ کے اندر کی نفرت، غصہ اور زہر ختم ہو، کوئی بولا کہ اس مشروب میں ذرا جھوٹ، ایون فیلڈ اپارٹمنٹس کے ٹکڑے اور کیلیبری فونٹ کی ٹائپنگ بھی شامل کر لیں۔
