سرگودھا(این این آئی)پاکستان مسلم لیگ ن کے راہنما سابق رکن قومی اسمبلی ڈاکٹر ذوالفقار علی بھٹی نے کہا ہے کہ وفاقی وزیر اسد عمر نے حکومت سے راہ فرار کا عندیہ دے دیا ہے۔انہوں نے کہا کہ ووٹ چوروں اور نکمے حکمرانوں کو پتہ چل چکا ہے کہ حکومت کرنا ان کے بس کی بات نہیں یہ صرف اور صرف گیڈر بھبھکیاں مار سکتے ہیں اور انا پرست اور فاشسٹ حکمران

انتقامی سیاست کوپروان چڑھا سکتے ہیں۔ڈاکٹر ذوالفقار علی بھٹی نے اپنے بیان میں کہا کہ ملک میں انارکی پھیلانے کی ہر ممکن کوشش اس حکومت وقت کے دور میں کی گئی عمران نیازی کو اب پتہ چل گیا ہے کہ اسکے دن گنے جاچکے ہیں اب بشیر میمن کے لگائے گئے الزامات کاحساب دینا اور مقدمات بھگتنے پڑنے ہیں اس لئے بھاگنے کی کوشش کی جارہی ہے اور بیانات پہلے سے داغنے شروع کر دئیے ہیں انہوں نے کہا تمام ضمنی الیکشنز میں عمران نیازی کے امیدواروں کو منہ کی کھانی پڑی اورناکامی سے دوچار ہونا پڑا‘عمران نیازی سمجھ چکا ہے کہ اب ان کی دال نہیں گلنے والی ہے 2018جنرل الیکشن میں بھی ان ووٹ چوروں کو غائبانہ طریقہ سے سلیکٹ کرکے اسمبلی میں بٹھایا گیا جس کا خمیازہ پاکستانی عوام کو ڈھائی سالوں میں بھگتنا پڑا۔ان کا کہنا تھا کہ عمران نیازی کو اب بھاگنے نہیں دیا جائے گا وہ اپنے بوجھ کے نیچے دب کر خود گرے گا اپوزیشن اسکے کارناموں کو عوام کے سامنیلا رہی ہے اورلاتی رہے کی اور ان ڈھائی سالوں میں ہونے والے عوام کے معاشی قتل کا حساب لیا جائے گا انہوں نے کہا کہ خوشحال ملک کا بیڑہ غرق کردیا گیا اس گھناؤنی سازش میں ملوث تمام کرداروں کو کیفر کردار تک پہنچایا جائے گا۔