اسلام آباد(مانیٹرنگ ڈیسک) سرگودھا میں نوجوان نے بھائی کے قتل کا بدلہ لینے کے لیے مخالف کو عدالت کے دروازے پر قتل کر دیا۔میڈیا رپورٹس کے مطابق تحصیل بھلوال میں ایڈیشنل سیشن جج کی عدالت کے سامنے نوجوان قمر انور

پیشی پر آیا ہوا تھا کہ بھلوال کے ہی رہائشی محمد عامر نے اس پر فائرنگ کردی جس سے وہ موقع پر جاں بحق ہوگیا۔ملزم محمد عامر فرار ہونے کی بجائے جائے وقوعہ پر بیٹھ گیا اور پولیس کے آنے پر گرفتاری دے دی۔ابتدائی تفتیش میں ملزم عامر نے بتایا کہ مقتول قمر انور نے 2019 میں اس کے بھائی کو قتل کیا تھا جس کا بدلہ لینے کے لیے اس نے قمر انور کو موت کے گھاٹ اتار دیا ہے۔اس واقعے کی ویڈیو بھی سامنے آ چکی ہے جس میں دیکھا جا سکتا ہے ملزم نے کس بے دردی سے قتل کیا۔واقعہ کے بعد ضلع کچہری کی سکیورٹی سخت کر دی گئی۔مقتول کے لواحقین نے تھانہ چوک میں شدید احتجاج کیا اورسکیورٹی اہلکاروں کو نامزد کرنے کا مطالبہ کیا، ڈی پی او نے واقعہ کا نوٹس لیتے ہوئے رپورٹ طلب کر لی۔ڈی پی او ذوالفقار احمد نے کہا کہ کسی کو قانون ہاتھ میں لینے کی اجازت نہیں دی جائے گی ۔