اسلام آباد(مانیٹرنگ ڈیسک/این این آئی)وزیراعظم عمران خان کا ناصر درانی کے انتقال پر کہنا ہےکہ پاکستان ایک بہترین پولیس افسر سے محروم ہو گیا ۔ سماجی رابطے کی و یب سائٹ ٹویٹر پر اپنے پیغام میں وزیراعظم نے اظہار افسوس کرتے کہا ہے کہ پاکستان ایک بہترین افسر سے محروم ہو گیا ہے ۔ عمران خان نے ناصر درانی کیلئے بلند درجات کی دعا کی اور غمزدہ خاندان کیلئے کہا ہے کہ

اللہ پاک انہیں صبر جمیل دے ۔ تحریک انصاف کے سینئر مرکزی رہنما جہانگیر ترین نے سابق آئی جی خیبرپختونخوا ناصر درانی کی وفات پرا ظہارافسوس کرتے ہوئے کہاکہ ناصر خان درانی کی اچانک وفات پر دلی صدمہ ہے۔ ناصر درانی ایک ایمان دار اور محنتی افسر تھا جس نے بطور آئی جی خیبر پختونخوا پولیس کے ادارے کو بدل کر رکھ دیا۔ اللہ تعالی سے دعا کہ انھیں جنت الفردوس میں اعلی مقام عطا کرے اور ان کے لواحقین کو اس مشکل گھڑی میں صبر جمیل دے۔ آمین۔ واضح ہے کہ سابق آئی جی خیبرپختونخوا ناصر درانی کورونا وائرس کی وجہ سے انتقال کر گئے، نجی ٹی وی کی رپورٹ کے مطابق ملک بھر میں کورونا وائرس سے اموات کا سلسلہ جاری ہے، سابق آئی جی کورونا وائرس کے باعث زندگی کی بازی ہار گئے وہ گزشتہ دس روز سے میو ہسپتال میں زیر علاج تھے۔ایم ایس میو ہسپتال ڈاکٹر افتخار کے مطابق سابق آئی جی ناصر درانی کو پھیھڑوں میں انفیکشن اور سانس میں دشواری کا سامنا تھا۔ گزشتہ ایک ہفتہ سے آئی سی یو میں وینٹی لیٹر پر تھے۔