لاہور (مانیٹرنگ ڈیسک) وزیراعلیٰ پنجاب کی معاون خصوصی فردوس عاشق اعوان کا کہنا ہے کہ آج صبح پیٹرول بموں اور تیزاب کی بوتلوں سے لیس جتھوں نے نواں کوٹ پولیس اسٹیشن پر حملہ کیا اور ڈی ایس پی سمیت 12 پولیس والوں کو اسلحے کے زور پر اغوا کرلیا۔نجی ٹی وی جیو نیوز کے مطابق فردوس عاشق اعوان کا کہنا تھا کہ آج صبح پیٹرول بموں اور تیزاب کی بوتلوں سے لیس جتھوں نے نواں کوٹ پولیس اسٹیشن پر حملہ کیا جس میں رینجرز اور پولیس اہلکار اندر پھنس گئے، حملے میں 6 پولیس اہل کار زخمی
بھی ہوئے۔معاون خصوصی کے مطابق جتھے ڈی ایس پی نواں کوٹ سمیت 12 پولیس والوں کو اسلحے کے زور پر اغوا کرکے اپنے مرکز میں لے گئے، جہاں 50 ہزار لیٹر کا آئل ٹینکر بھی رکھا گیا ہے۔معاون خصوصی کا کہنا تھا کہ پولیس نے کوئی آپریشن پلان یا آپریشن شروع نہیں کیا، پولیس کی جانب سے جوابی کارروائی صرف اپنے دفاع اور مغوی پولیس اہلکاروں کو بچانے کے لیے کی گئی۔فردوس عاشق اعوان کے مطابق ان مظاہرین کے ہاتھوں 6 پولیس اہلکار شہید ہو چکے ہیں اور 700 سے زائد زخمی ہیں۔
