اسلام آباد (این این آئی)سپریم کورٹ کے جسٹس قاضی فائز عیسیٰ نے توہین عدالت کی درخواستیں سماعت کیلئے مقرر نہ کرنے کا معاملہ پھر اٹھادیا۔جسٹس فائز عیسیٰ نے استفسار کیا کہ توہین عدالت کی درخواستیں سماعت کے لیے کیوں مقرر نہیں ہوئیں؟،
کیا سپریم کورٹ رجسٹرار کی مرہون منت ہے؟انہوں نے رجسٹرار سپریم کورٹ کی جانب سے توہین عدالت کی درخواستیں سماعت کے لیے مقرر نہ کرنے کا معاملہ اٹھایا، جسٹس عمر عطا بندیال نے انہیں (آج) بدھ کو دلائل دینے کی ہدایت کردی۔سرینا عیسیٰ نے کہا کہ فواد چوہدری نے عدالت کو اسکینڈلائز کیا، لیکن کوئی کارروائی نہیں ہوئی۔انہوں نے کہا کہ یوسف رضا گیلانی و دیگر سیاسی جماعتوں کے رہنمائوں کی توہین عدالت کی سزائیں سنائی گئیں۔بینچ کے سربراہ جسٹس عمرعطا بندیال نے جسٹس فائز عیسیٰ کو بدھ کو دلائل دینے کی ہدایت کرتے ہوئے کہا کہ نظرثانی کیس سنیں گے تب تک باقی درخواستیں بھی مقرر ہوجائیں گی۔
