ڈسکہ (این این آئی)پاکستان مسلم لیگ نواز کی نائب صدر مریم نواز نے کہا ہے کہ پوری قوم کی نظریں ڈسکہ کے ضمنی انتخاب پر ہیں، ڈسکہ ہفتہ کو 22کروڑ عوام کے جذبات کی نمائندگی کرے گا۔قومی اسمبلی کی نشست این اے 75 ڈسکہ میں ہونے والے ضمنی انتخابات سے قبل سماجی رابطے کی ویب سائٹ ٹوئٹر پر اپنے پیغام میں

مریم نواز نے کہا کہ ڈسکہ کے عوام کو اس ووٹ چور حکومت سے بدلہ لینے کا ایک اور موقع ملا ہے۔ ن لیگی رہنما مریم نواز نے کہا کہ حکومت نے غریب سے روٹی اور پاکستان سے ترقی چھین لی ہے۔ حکومتی خوف کی وجہ سے 22 پولنگ اسٹیشنز پر الیکشن کمیشن کے اہلکار اغوا ہوئے تھے۔ ڈسکہ قوم کے جذبات کی نمائندگی کرتے ہوئے حکومت پر عدم اعتماد کریگا۔مریم نواز نے کہا کہ ڈسکہ ٹے وعدے کرنے والے ان عناصر کو بے نقاب کرے گا۔ ڈسکہ کے عوام ہفتہ کو پولنگ عملے کے تحفظ کیلئے بھی پہرا دیں گے تاکہ کوئی ووٹ کی بے حرمتی کیلئے پولنگ عملے کو اغوا نہ کر سکے۔ پاکستان مسلم لیگ (ن) کی نائب صدر مریم نواز نے کہا ہے کہ ڈسکہ کے غیور اور بہادر عوام کو ان کے ووٹ کا حق واپس مل گیا ہے اس لئے وہ اپنے ووٹ کو آٹا، چینی ،بجلی ،گیس ،دوائی اورووٹ چوروں کو سبق سکھانے کے لئے استعمال کریں،عوام تباہی کن مہنگائی،لاقانونیت،کوڑے کے ڈھیروں ،تاریخی نا اہلی اور نا لائقی کے خلاف ووٹ دیں۔ اپنے بیان میں انہوں نے کہا کہ میں ڈسکہ کے غیور اور بہادر عوام کو ایک بار پھر خراج تحسین پیش کرنا چاہتی ہوں جنہوں نے نہ صرف یہ کہ اپنے ووٹ پر پہرہ دیا بلکہ ووٹ چورو ں کو رنگے ہاتھوں پکڑا،اپنے ووٹ کا حق ووٹ چوروں سے واپس چھینا ،اب جبکہ آپ کے عزم اور

بہادری کی وجہ سے یہ حق آپ کو واپس مل گیا ہے اس حق کو نا اہل حکمرانوں کے خلاف استعمال کریں ۔ انہوں نے کہا کہ یہ حکومت جتنے دن رہے گی عوام پر ظلم اورستم پہاڑ توڑتی رہے گی ۔ مجھے بہت فکر اور افسوس ہوتا ہے جب ایک طرف عوام مہنگائی سے پس رہے ہوتے ہیں تو دوسری طرف بجلی اور گیس کے لمبے لمبے بل عوام کی کمر توڑتے ہیں۔ میری ڈسکہ کے غیور عوام سے اپیل ہے کہ پہلے سے زیادہ عزم حوصلے اور جذبے

سے نکلیں اور شیر پر مہر لگائیں، نوازشریف کی ترقی پر مہر لگائیں اور اس عوام دشمن جعلی حکومت کے خلاف ڈٹ کر اپنا فیصلہ سنائیں۔ مجھے یقین ہے کہ ڈسکہ کی بیٹی نوشین افتخار جس نے شیرنی کی طرح آپ کے ووٹ کے تقدس کا مقدمہ لڑا ہے اورجیتا ہے اسی طرح وہ منتخب ہو کر ڈسکہ کی عوام کا مقدمہ بھی لڑے گی اوران کی آواز بنے گی ۔ میں اللہ تعالیٰ سے دعا کرتی ہوں 10اپریل کاسورج مسلم لیگ (ن) کی فتح کی نوید لے کر طلوع ہو ۔

موضوعات:مریم نواز