کراچی(این این آئی) فائیواسٹار چورنگی پر شہری سے مبینہ موٹرسائیکل چھیننے والا سب انسپکٹر نکلا، سب انسپکٹر کامران سکیورٹی زون ٹو کا اہلکار اور بلاول ہائوس پر تعینات ہے۔تفصیلات کے مطابق کراچی میں فائیواسٹارچورنگی پر پولیس اہلکار کی جانب سے موٹرسائیکل چھیننے کا معمہ حل ہوگیا ، شہری سے مبینہ موٹرسائیکل چھیننے والا سب انسپکٹر نکلا۔اس ضمن میںذرائع نے

بتایاکہ سب انسپکٹر کامران کی حالیہ تعیناتی بلاول ہائوس میں ہے ، ابتدائی تفتیش میں انکشاف کیا گیا کہ ملزم نے پکڑے جانے پر خود کو سائوتھ انویسٹی گیشن کا افسر ظاہر کیا۔تفتیشی ذرائع نے بتایاکہ ملزم نے اپنا نام پہلے علی شاہ بتایا، تاہم مزیدتفتیش کرنے پر پتہ چلا ملزم کانام کامران ہے اور سیکیورٹی زون 2 میں سب انسپکٹر ہے۔ذرائع کے مطابق کامران کے ساتھ شلوار قمیض میں ملبوس ایک شخص موجود تھا، شہری کے مطابق کامران اس سے موٹرسائیکل چھین رہا تھا، سب انسپکٹر کیوں ایساکررہاتھا ، اس حوالے سے تفتیش کر رہے ہیں۔دوسری جانب مبینہ پولیس اہلکار تاحال پولیس کی پہنچ سے دور ہے ، سیکیورٹی زون ٹو کے مطابق مبینہ اہلکار ان کے پاس تعینات نہیںجبکہ مبینہ اہلکار ایس ایس یو کے ماتحت بھی کام نہیں کر رہا۔انکوائری کمیٹی کے مطابق سیکیورٹی کے دیگر محکموں کو بھی چیک کر رہے ہیں اور مبینہ اہلکار سے پولیس کا رابطہ ہوگیا ہے ، رابطے پر ملزم نے بتایا تھا کہ وہ سکیورٹی زون ٹو کا اہلکار ہے اور بلاول ہائوس پر تعینات ہے، جلد تحقیقات کرکے اصلیت سامنے لائیں گے۔یاد رہے 5 اسٹار چورنگی پر پولیس اہلکار کی شہری سے مبینہ طور پر موٹر سائیکل چھیننے کی ویڈیو وائرل ہوئی تھی ، موٹر سائیکل چھیننے پر متاثرہ شہری نے شور مچایا تو عوام کا رش لگ گیا، جس کی وجہ سے شہری کی موٹرسائیکل بچ گئی۔