لاہور( این این آئی)ترجمان پنجاب حکومت مسرت جمشید چیمہ نے کہا ہے کہ مسلم لیگ(ن) کی سیاست اس نہج پر پہنچ گئی ہے کہ اس نے آصف زرداری اور بلاول کو اپنا سیاسی پیر و مرشد تسلیم کرلیا ہے ،پیپلزپارٹی ماضی میں روا رکھے جانے والے رویے پر مسلم لیگ (ن) سے بدلہ لے رہی ہے ،وزیر اعظم عمران خان کو ایوان سے اعتماد کا ووٹ ملنے کے بعد اپوزیشن کی پریشانی بڑھ گئی ہے ۔ اپنے ایک بیان میں انہوں نے کہا کہ مسلم لیگ (ن)میں قیادت کیلئے جنگ عروج پر ہے جس کا اس کی اتحادی پیپلزپارٹی بھرپور فائدہ اٹھا رہی ہے اور آنے والے دنوں میں مسلم لیگ کے حصے

بخرے ہونااٹل ہے ۔ انہوں نے کہا کہ اپوزیشن کے اوچھے ہتھکنڈوں کے باوجود وزیر اعظم عمران خان ان کا مقابلہ کرنے کیلئے پر عزم ہیں اوراسی وجہ سے ان کی راتوں کی نیندیں اڑی ہوئی ہیں ۔ مسلم لیگ (ن) اور پیپلز پارٹی کرپشن کاپیسہ بہانے میں اپنا کوئی ثانی نہیں رکھتے لیکن تحریک انصاف اس طرح کی روش اپنا نے کی بجائے انہیں شفافیت کے معیار کو اپنانے پر مجبور کر دے گی ۔مسرت جمشید چیمہ نے کہا کہ مسلم لیگ (ن) سیاسی طور پر اتنی لاچار ہو چکی ہے کہ اسے آصف زرداری اور بلاول کو اپنا سیاسی پیر و مرشد تسلیم کرنا پڑ گیا ہے اور اس کے پیچھے لگی ہوئی ہے۔